स्ट्रेट अफ होर्मुज खोल्न इरानले अघि सारेको प्रस्ताव ट्रम्पले गरे अस्वीकार, इरानको कडा प्रतिक्रिया

काठमाडौँ । अमेरिकी राष्ट्रपति डोनाल्ड ट्रम्पले स्ट्रेट अफ होर्मुज सात दिनभित्र खोल्न इरानले अघि सारेको प्रस्ताव अस्वीकार गरेका छन् । इरानले यसमा कडा प्रतिक्रिया जनाएको छ । 

Watch On

अन्तर्राष्ट्रिय सञ्चार माध्यमकाअनुसार इरानका परराष्ट्रमन्त्री अब्बास अराघ्चीले यदि अमेरिकासँगको युद्ध पुनः सुरु हुन्छ भने आफ्नो देश प्रलयकारी युद्धसम्मका लागि पनि पूर्ण रूपमा तयार रहेको चेतावनी दिएका छन् । यद्यपि, उनले इरान अझै पनि कूटनीतिक समाधानका लागि खुला रहेको स्पष्ट पारेका छन् ।

अमेरिकी राष्ट्रपति डोनाल्ड ट्रम्पले युद्ध अन्त्य गर्न र  हर्मुज जलमार्ग (स्ट्रेट अफ होर्मुज) पुनः खोल्नका लागि तेहरानले अघि सारेको सात दिने खाकालाई अस्वीकार गरेपछि परराष्ट्रमन्त्री अराघ्चीको यो कडा प्रतिक्रिया आएको हो ।

अराघ्चीले भने, 'हामी कूटनीति र युद्ध दुवैका लागि एकैसाथ तयार छौँ । अमेरिकी आक्रमणको सामना गर्न हामी दह्रोसँग उभिनेछौँ । अब युद्ध कि कूटनीति भन्ने छनोट अमेरिकी राष्ट्रपति ट्रम्पको हातमा छ ।'   

विश्वको ऊर्जा आपूर्तिका लागि अत्यन्त महत्वपूर्ण मानिने होर्मुज जलडमरूमध्य अहिले संयुक्त राज्य अमेरिका र इरानबीचको द्वन्द्वको मुख्य केन्द्र बनेको छ । करिब सात महिनाअघि इरानमाथि भएको घातक सैन्य आक्रमणपछि यो द्वन्द्व थप चर्किएको हो ।

इरानी विदेशमन्त्री अराघ्चीका अनुसार इरानको प्रस्तावमा लेबनानसहित सम्पूर्ण मध्यपूर्वमा जारी सबै सैन्य गतिविधि अन्त्य गर्नुपर्ने र केही महिनाअघि असफल भएको युद्धविराम सम्झौताका सर्तहरू कार्यान्वयन गर्नुपर्ने माग गरिएको छ ।

उक्त सम्झौतामा रोक्का गरिएका इरानी सम्पत्ति फुकुवा गर्ने, इरानी तेलमाथिका प्रतिबन्ध हटाउने र अमेरिकी नौसैनिक नाकाबन्दी अन्त्य गर्ने विषय समावेश थिए ।

अराघ्चीले  इरानका सर्तहरू स्पष्ट रहेको र ती पूरा भएपछि मात्र होर्मुज जलडमरूमध्य खोल्ने प्रक्रिया अघि बढ्ने बताए । उनले इरान कूटनीति र वार्ताबाट कहिल्यै पछि नहटेको, तर आफ्ना अधिकारबाट पनि पछि नहट्ने बताए ।