बाढी पहिरोबाट १४ सय ३१ मेगावाट विजुली उत्पादन अवरुद्ध, कसरी व्यवस्थापन भइरहेको छ ?

काठमाडौँ । भदौ १० को भोटेकोशी नदीको विनाशकारी बाढी र असोज ९-११ गतेको अति भारी वर्षा र बाढीले देशको विद्युत प्रणालीमा ठूलो क्षति पुगेको छ ।

Watch On

बाढी पहिरोले १४ सय ३१ मेगावाट विद्युत अवरुद्ध हुन पुगेको हो । 

नेपाल विद्युत प्राधिकरणकाअनुसार भोटेकोशी बाढीबाट १३ जलविद्युत आयोजनामा क्षति पुगेको थियो भने पछिल्लो वर्षा र बाढीबाट २७ उत्पादन केन्द्रबाट विद्युत उत्पादन बन्द भएको छ । 

प्राधिकरणका कार्यकारी निर्देशक दिर्घायुकुमार श्रेष्ठकाअनुसार भोटेकोशी बाढीले त्रिशूली र भोटेकोशी करिडोरका सरकारी तथा निजी क्षेत्रका गरी १३ वटा जलविद्युत् आयोजनाहरूमा ठुलो क्षति पुर्‍याएको छ । करिब ४३० मेगावाट बराबरको विद्युत् उत्पादन क्षमता राष्ट्रिय प्रसारण प्रणालीबाट बाहिरिन पुगेको छ ।

यसैगरी पछिल्लो वर्षा र बाढीले गण्डकी बेसिनको विभिन्न प्रसारण लाइनमा क्षति पुग्न गएको कारण सो प्रसारण लाइनमार्फत प्रवाह हुने विद्युत उत्पादन केन्द्रको विद्युत उत्पादन प्रभावित हुन पुगेको छ । साथै, नदीमा आएको बाढी तथा अत्यधिक बहावका कारण गण्डकी प्रदेशका केही स्थानमा विद्युत उत्पादन केन्द्र बन्द अवस्थामा पुगेकोले विद्युत आपूर्तिमा समेत केही असहज अवस्था आएको कार्यकारी निर्देशक श्रेष्ठले बताए ।

बाढीको कारण कालिगण्डकी कोरिडोर प्रसारण लाइन अवरुद्ध हुँदा उक्त प्रसारण लाइनमार्फत प्रवाह हुने १३ वटा उत्पादन केन्द्रको करिव ३७० मेगावाट विद्युत उत्पादन बन्द भएको छ । सो बाहेक म्याग्दी, स्याङ्गजा, काश्की, लमजुङ्ग र तनहुँ जिल्लामा अवस्थित थप १४ वटा उत्पादन केन्द्रको करिव ६३० मेगावाट विद्युत उत्पादन केन्द्र समेत नदीमा अत्यधिक बहावका कारण वन्द अवस्थामा रहेको कार्यकारी निर्देशक श्रेष्ठले बताए । उनकाअनुसार पछिल्लो बाढीका कारण विद्युत प्रणालीमा समग्रमा करिव एक हजार मेगावाट विद्युत उत्पादन अवरुद्ध हुन गएको छ । 

कसरी हुँदैछ व्यवस्थापन ?

१४ सय ३१ मेगावाट विद्युत उत्पादन अवरुद्ध हुन गए पनि विद्युत प्राधिकरणले विद्युत आपूर्ति प्रणाली सन्तुलनका लागि केही उद्योगहरुमा विद्युत खपत घटाई व्यवस्थापन गरिरहेको छ । 

प्राधिकरणका प्रमुख श्रेष्ठ अहिले वर्षायाम भएकाले अन्य आयोजनाहरू पूर्ण क्षमतामा चलिरहँदा राहत दिएको बताउँछन् । 

राष्ट्रिय प्रसारण प्रणालीमा कुल जडित क्षमता करिब ४ हजार ३०० मेगावाट पुगिसकेको छ । जबकी राष्ट्रिय माग २५०० देखि ३ हजार मेगावाटको बिचमा रहेको छ । यही बीचबाट प्राधिकरणले व्यवस्थापन गरिरहेको प्राधिकरणका कार्यकारी निर्देशक श्रेष्ठले बताए । 

राष्ट्रिय प्रसारण लाइनबाट विद्युत बाहिर जाँदा सन्तुलन राख्न चाप परेको भन्दै श्रेष्ठले कुलेखानीजस्ता जलाशययुक्त आयोजनाको पानी सञ्चित राखिने र आवश्यक परे भारतबाट थप आयात गरी आपूर्ति प्रणाली चुस्त राखिने बताए ।