केपी ओलीको पालादेखिको फाइल खोल्दै प्रतिभा रावल, प्रारम्भमै देखियो अनियमितता

काठमाडौँ । भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलले मन्त्रालयअन्तर्गत विगतमा भएका अनियमितताको अध्ययन थालेकी छिन् । 

Watch On

मन्त्री रावलले नापी तथा मालपोतबाट ०७७/०७८ यता भएका सफ्टवेयर खरिदको अध्ययन थालेकी हुन् । 

अहिले सफ्टवेयर खरिद गर्नका लागि विगतमा कस्तो अभ्यास रहेछ भनेर हेर्दा अनियमितता देखिएको  मन्त्री रावलको सचिवालयले जनाएको छ । 

'नापी तथा मालपोत प्रणालीलाई पारदर्शी बनाउन अहिले नयाँ सिस्टम गर्ने तयारी भइरहँदा पुराना खरिद कसरी भएको रहेछ भनेर अध्ययन गर्दा प्रारम्भिक रुपमा नै अनियमितताको शंका देखियो,' सचिवालयका एक सदस्यले भने । 

प्रारम्भमै अनियमितता देखिएपछि अहिलेसम्मका सबै खरिदहरुको छानबिन गर्न अध्ययन गर्ने निर्णयमा मन्त्री रावल पुगेकी हुन् । यसका लागि मन्त्री रावलले विशेष छानबिन समिति बनाउँदै छिन् । 

समितिले नापी  र मालपोत विभागबाट भएका सफ्टवेयर खरिदको सबै फाइल अध्ययन गर्नेछ । 

प्रारम्भिक अध्ययनमै अनियमितताको शंका देखिएपछि थप अध्ययन जरुरी भएको सचिवालयको भनाइ छ । 

समितिले ७७/०७८ देखि नै नापी र मालपोत विभागबाट भएका खरिदहरुको अध्ययन गर्नेछ । यतिबेला केपी ओलीको नेतृत्वमा सत्ता थियो ।

त्यसपछि शेरबहादुर देउवा र प्रचण्ड क्रमश प्रधानमन्त्री बनेका थिए । यी सबैको पालाको खरिद प्रक्रियाको अध्ययन हुने भूमि मन्त्रालयले जनाएको छ ।