आज महानवमी पर्व, शक्तिपीठमा बिहानैदेखि भक्तजनको घुइँचो

काठमाडौं । बडादसैँको नवौँ दिन आज महानवमी पर्व नवदुर्गा भगवतीको विशेष पूजा आराधना गरी मनाइँदै छ। यस अवसरमा देशभरका देवी मन्दिर तथा शक्तिपीठमा बिहानैदेखि भक्तजनको घुइँचो लागेको छ।

Watch On

आश्विन शुक्ल नवमीका दिन मनाइने महानवमीमा दसैँघर, कोत तथा विभिन्न देवी मन्दिर र शक्तिपीठमा दुर्गा भवानीको विशेष पूजा आराधना गरिन्छ। यस दिन बोका, हाँस, कुखुरा र राँगाको बलि दिने तथा दुर्गा सप्तशती (चण्डी), देवीभागवत र देवीस्तोत्र पाठ गर्ने परम्परा छ।

महानवमीका अवसरमा काठमाडौं उपत्यकाका गुह्येश्वरी, मैतीदेवी, दक्षिणकाली, भद्रकाली, नक्साल भगवती, कालिकास्थान, शोभा भगवती, तलेजु भवानी, विजेश्वरी र इन्द्रायणीमा विशेष पूजा तथा दर्शनका लागि भक्तजन पुगेका छन्।

त्यसैगरी, उपत्यकाबाहिर नवलपुरको मौलाकालिका, धरानको दन्तकाली, भोजपुरको सिद्धकाली, ताप्लेजुङको पाथीभरा, गोरखाको मनकामना, दाङको अम्बिकेश्वरी, डडेल्धुराको उग्रतारा, बैतडीको त्रिपुरासुन्दरी र डोटीको शैलेश्वरीलगायत शक्तिपीठमा पनि बिहानैदेखि पूजापाठ तथा पशुबलि दिन भक्तजनको घुइँचो लागेको छ।

नवरात्रका अवसरमा देवीको आराधना गरी पूजा गरेमा शक्ति, ऐश्वर्य र विद्या प्राप्त हुने धार्मिक विश्वास छ। वैदिक सनातन धर्मावलम्बीले आश्विन शुक्ल प्रतिपदादेखि नवमीसम्म दुर्गा देवीको विशेष आराधना गर्छन्। यसरी नौ दिनसम्म विभिन्न देवस्थल तथा घरघरमा पूजा आराधना गरेपछि विजयादशमीदेखि कोजाग्रत पूर्णिमासम्म प्रसादस्वरूप टीका र जमरा लगाउने गरिन्छ।

दुर्गा पक्षसमेत भनिने दसैँको पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौँ दिन स्कन्दमाता, छैटौँ दिन कात्यायनी, सातौँ दिन कालरात्रि, आठौँ दिन महागौरी र नवौँ दिन सिद्धिदात्रीको पूजा आराधना गरिन्छ। देवीका यी नौ रूपलाई नवदुर्गा भनिन्छ।

यसैबीच, काठमाडौं उपत्यकाका नक्साल भगवती, शोभा भगवती, भद्रकाली, मैतीदेवी, कालिकास्थान, सङ्कटा र नरदेवीलगायत शक्तिपीठलाई रङ्गीचङ्गी बत्तीले सजाइएको छ। यी शक्तिपीठमा बिहानदेखि रातिसम्मै भक्तजन पूजाआजाका लागि पुग्ने गरेका छन्।