लगाइयो साइतको टीका

काठमाडौँ । विजयादशमीका अवसरमा बुधबार (आज) बिहान १०ः२६ बजेको शुभ साइतमा मान्यजनबाट टीका, जमरा र आशीर्वाद ग्रहण गरिएको छ।

Watch On

दशैं अर्थात् दुर्गापक्षको मुख्य दिन आज मान्यजनको हातबाट नवदुर्गाको प्रसादस्वरूप रातो टीका र समृद्धिको प्रतीक जमरा लगाएर विजयादशमी मनाइँदै छ।

नेपाल पञ्चाङ्ग निर्णायक विकास समितिले टीका प्रसाद ग्रहण गर्न चाहनेका लागि आज बिहान १०ः२६ बजेको साइत उत्तम रहेको जनाएको थियो। विजयादशमी आफैँमा शुभ दिन भएकाले सर्वसाधारणले टीका लगाउन साइत खोज्नु नपर्ने समितिका अध्यक्ष प्रा. पुरुषोत्तम भट्टराईले बताएका छन्। राज्य सञ्चालकले भने शुभ साइतमै टीका लगाउनुपर्ने उनले जानकारी दिए।

घटस्थापनाका दिन दशैंघर वा पूजाकोठामा स्थापना गरी नौ दिनसम्म पूजा–आराधना गरिएकी देवीको प्रसाद आज मान्यजनबाट ग्रहण गर्ने परम्परा छ। घटस्थापनाका दिन राखिएको जमरा समृद्धिको प्रतीकका रूपमा टीकासँगै लगाइन्छ।

आश्विन शुक्ल दशमीका दिन मनाइने विजयादशमी असत्यमाथि सत्य र आसुरी शक्तिमाथि दैवी शक्तिको विजयको प्रतीक हो। धार्मिक मान्यताअनुसार त्रेतायुगमा आजकै दिन भगवान् रामले रावणमाथि विजय प्राप्त गरेको स्मरणमा यो पर्व मनाउन थालिएको हो।

आज गुरु–पुरोहित, हजुरबा–हजुरआमा, बुबा–आमा तथा मान्यजनबाट टीका, जमरा र प्रसाद ग्रहण गरी सुख, शान्ति, समृद्धि, दीर्घायु र सफलताको आशीर्वाद लिने परम्परा छ।

आजदेखि कोजाग्रत पूर्णिमासम्म मान्यजनबाट टीका, जमरा र आशीर्वाद ग्रहण गर्न सकिनेछ।