दसैँले राष्ट्रिय एकता र सद्भाव बलियो बनाउँछ : सभामुख अर्याल

काठमाडौँ । सभामुख डोलप्रसाद (डीपी) अर्यालले दसैँजस्ता चाडपर्वले नेपालीबीचको पारस्परिक मेलमिलाप, भ्रातृत्व र सामाजिक एकतालाई थप मजबुत बनाउने बताएका छन्।

Watch On

बडादसैँ, २०८३ का अवसरमा बुधबार शुभकामना सन्देश जारी गर्दै उनले बहुजातीय, बहुभाषिक, बहुधार्मिक तथा बहुसांस्कृतिक विशेषतायुक्त नेपालमा दसैँले विविधताबीचको सौहार्दपूर्ण एकतालाई मूर्त रूप दिने विश्वास व्यक्त गरेका हुन्।

दूराचारमाथि सदाचार र असत्यमाथि सत्यको विजयका रूपमा मनाइने यस पर्वले सबैलाई समन्याय, सदाचार र लोकतान्त्रिक मूल्य–मान्यताको मार्गमा अघि बढ्न प्रेरणा दिने सभामुख अर्यालले उल्लेख गरेका छन्।

उनले बडादसैँका अवसरमा स्वदेश तथा विदेशमा रहेका सम्पूर्ण नेपालीमा सुख, शान्ति, समृद्धि, सुस्वास्थ्य, दीर्घायु र निरन्तर प्रगतिको शुभकामनासमेत व्यक्त गरेका छन्।

जनताको सार्वभौमसत्ता र राजकीय सत्तालाई अक्षुण्ण राख्दै जनभावनाअनुरूप समयसापेक्ष तथा जनमैत्री कानुन निर्माण र परिमार्जन गरी मुलुकमा सुशासन, सामाजिक न्याय र समृद्धि हासिल गर्न सङ्घीय संसद् सदैव क्रियाशील र प्रतिबद्ध रहेको उनले बताएका छन्।

विजयादशमीको अवसरमा नेपालको संविधानलाई शिरोपर गर्दै राष्ट्रिय एकतालाई थप सुदृढ तुल्याउन माता दुर्गा भवानीले आशीर्वाद प्रदान गरून् भन्ने कामना गर्दै सभामुख अर्यालले दसैँले नेपालीमा नवीन ऊर्जा, सकारात्मक सोच, नवप्रवर्तन र राष्ट्र निर्माणको संकल्प पैदा गर्ने विश्वास व्यक्त गरेका छन्।