समाज

हुम्ला र मुगुका अधिकांश बस्तीमा किन भयो सञ्चार सेवा प्रभावित?

सिधाकुरा

बुधबार, कात्तिक ४, २०८३

हुम्ला र मुगुका अधिकांश बस्तीमा किन भयो सञ्चार सेवा प्रभावित?

हुम्ला । मुगुको रुघा र सोरु गाउँपालिकाको नाथर्पुमा रहेका टावरका ‘लिङ्क डिभाइस’मा समस्या आएपछि हुम्ला र मुगुका अधिकांश बस्तीमा इन्टरनेट तथा टेलिफोन सेवा प्रभावित भएको छ ।

Watch On

गत सातादेखि फोरजी टावरमा देखिएको प्राविधिक समस्या तत्काल समाधान गर्न नसकिने नेपाल टेलिकमले जनाएको छ । टेलिकमका मुगु प्रमुख उमेश चौधरीका अनुसार टावरमा जडान गरिएका ‘लिङ्क डिभाइस’मा समस्या आएपछि सञ्चार सेवा अवरुद्ध भएको हो । दसैँ बिदामा कर्मचारी घर गएकाले बिदा सकिएपछि मात्रै मर्मत गर्न सकिने उनले बताए ।

टावरमा समस्या आएपछि मुगुको सोरु गाउँपालिकासहित हुम्लाका अदानचुली, ताँजाकोट, सर्केगाड र चङ्खेली गाउँपालिकाका अधिकांश बस्तीमा सञ्चार सेवा प्रभावित भएको छ ।

अदानचुली गाउँपालिका–४ का वडासदस्य सिंह बोहराले टेलिकमका कर्मचारीलाई पटक–पटक फोन गरेर समस्या समाधान गर्न आग्रह गरिएको बताए । सञ्चार सेवा अवरुद्ध हुँदा दसैँमा घर आउने–जाने आफन्तसँग सम्पर्क गर्न र रकम पठाउनसमेत समस्या भएको उनले बताए ।

भौगोलिक विकटताका कारण अन्य सञ्चार माध्यमको विकल्पसमेत सहज नभएका यी क्षेत्रका नागरिक टेलिकमको सेवा बन्द हुँदा थप सास्तीमा परेका छन् ।

प्रकाशित मिति: बुधबार, कात्तिक ४, २०८३

प्रतिक्रिया दिनुहोस्