समाज

भारत–अमेरिका व्यापार सम्झौता टुङ्ग्याउने तयारी

सिधाकुरा

बुधबार, कात्तिक ४, २०८३

भारत–अमेरिका व्यापार सम्झौता टुङ्ग्याउने तयारी

काठमाडौँ । भारत र अमेरिकाले व्यापार, रक्षा, प्रविधि तथा ऊर्जा सुरक्षामा सहकार्य विस्तार गर्दै प्रस्तावित द्विपक्षीय व्यापार सम्झौता चाँडै टुङ्ग्याउने प्रतिबद्धता व्यक्त गरेका छन् ।

Watch On

मुम्बईमा मङ्गलबार भारतीय विदेशमन्त्री एस जयशङ्कर र अमेरिकी विदेशमन्त्री मार्को रुबियोबीच भएको भेटवार्तामा दुई देशबीचको सम्बन्धका साथै क्षेत्रीय तथा विश्वव्यापी घटनाक्रमबारे छलफल भएको भारतीय विदेश मन्त्रालयले जनाएको छ ।

भेटवार्ताका क्रममा रुबियोले प्रस्तावित व्यापार सम्झौता अन्तिम चरणमा पुगेको र केही प्राविधिक विषय मात्र टुङ्ग्याउन बाँकी रहेको बताएका छन् । सम्झौताका सबै विवरणमा सहमति भएपछि मात्र यसको घोषणा गर्नुपर्नेमा उनले जोड दिएका छन् ।

भारत र अमेरिकाबीच प्रमुख राष्ट्रिय हितका विषयमा असाधारण तालमेल रहेको उल्लेख गर्दै रुबियोले दुई देशबीच कूटनीतिक तथा आर्थिक सहकार्य विस्तार गर्नुपर्ने बताएका छन् । उनले मुम्बईलाई भारतको आर्थिक केन्द्रका रूपमा उल्लेख गर्दै त्यहाँबाट व्यापार तथा लगानी विस्तारको सम्भावना रहेको धारणा राखेका छन् ।

भारतको औपचारिक भ्रमणमा रहेका रुबियोले गुजरातको जामनगरमा उन्नत ऊर्जा सहकार्यबारे छलफल गर्ने कार्यक्रम छ । उनको भ्रमणले दुई देशबीचको रणनीतिक साझेदारी थप सुदृढ हुने अपेक्षा गरिएको छ ।

प्रकाशित मिति: बुधबार, कात्तिक ४, २०८३

प्रतिक्रिया दिनुहोस्