स्पेसएक्स र टेस्ला गाभ्ने प्रस्तावको पक्षमा मस्क

एजेन्सी।  अमेरिकी अर्बपति एलन मस्कले आफ्नो स्वामित्वका कम्पनी स्पेसएक्स र टेस्लालाई गाभ्ने प्रस्तावको समर्थन गरेका छन्। दुवै कम्पनीका स्वतन्त्र सञ्चालकहरूको विशेष समितिले सम्भावित मर्जरबारे अध्ययन गरिरहेका बेला मस्कले यस्तो समर्थन जनाएका हुन्। 

Watch On

स्पेसएक्सले जुलाईदेखि सेप्टेम्बरसम्मको तेस्रो त्रैमासिकमा चार अर्ब ४० करोड अमेरिकी डलर खुद नाफा कमाएको छ। अघिल्लो वर्षको सोही अवधिमा कम्पनीले एक अर्ब १० करोड डलर घाटा बेहोरेको थियो। कम्पनीको आम्दानी १६१ प्रतिशतले बढेर १४ अर्ब ६० करोड डलर पुगेको छ। 

मस्कका अनुसार सम्भावित मर्जरबारे दुवै कम्पनीका स्वतन्त्र सञ्चालकहरूको विशेष समितिले अध्ययन गरिरहेको छ। स्वार्थको द्वन्द्वका कारण आफू छलफलमा सहभागी हुन नसक्ने उनले बताएका छन्। मर्जर हुने निश्चित नभएको र त्यसका लागि टेस्लाका सेयरधनीको समर्थन आवश्यक पर्ने उनको भनाइ छ। 

स्पेसएक्सको आम्दानी बढ्नुमा कृत्रिम बुद्धिमत्ता (एआई) सेवा र कम्प्युटिङ क्षमता भाडामा दिने सम्झौताले महत्त्वपूर्ण योगदान पुर्‍याएका छन्। कम्पनीको एआई व्यवसायको आम्दानी बढेर सात अर्ब ६० करोड डलर पुगेको छ। यसले स्पेसएक्सको आम्दानीमा सबैभन्दा ठूलो हिस्सा ओगटेको छ। 

कम्पनीले एआई पूर्वाधार विस्तारमा ठूलो लगानी गरिरहेको छ। मस्कले सन् २०२७ मा थप १० गिगावाट कम्प्युटिङ क्षमता सञ्चालनमा ल्याउने लक्ष्य राखेका छन्।

यसैबीच, स्पेसएक्सको स्याटेलाइट इन्टरनेट सेवा स्टारलिङ्कको आम्दानी ६९ प्रतिशतले बढेर पाँच अर्ब २० करोड डलर पुगेको छ। सेप्टेम्बरको अन्त्यसम्म स्टारलिङ्कका ग्राहक सङ्ख्या एक करोड ३६ लाख पुगेको कम्पनीले जनाएको छ। 

स्पेसएक्सले मङ्गल अभियानका लागि महत्त्वपूर्ण मानिएको स्टारसिप रकेटबाट पहिलो आम्दानी दिने उडानसमेत पूरा गरेको छ। उक्त उडानमार्फत २६ वटा नयाँ पुस्ताका स्टारलिङ्क उपग्रह पृथ्वीको कक्षमा पुर्‍याइएको कम्पनीले जनाएको छ।