करियरको एक हजार गोलनजिक रोनाल्डो

काठमाडौँ । क्रिस्टियानो रोनाल्डोका लागि करियरको एक हजार गोलको आँकडा छुनु अब लगभग निश्चित जस्तै देखिएको छ ।

Watch On

साउदी प्रो लिगअन्तर्गत बिहीबार भएको खेलमा रोनाल्डोले अल नासरका लागि १५ मिनेटभित्रै ह्याट्रिक गर्दै टोलीलाई अल खालुदविरुद्ध ५-३ को जित दिलाए । यससँगै उनको करियरको कुल गोल संख्या ९८५ पुगेको छ ।

खेल २-२ को बराबरीमा रहेको स्थितिमा रोनाल्डोले ६६औँ, ७२औँ र ८१औँ मिनेटमा गोल गर्दै टोलीको जित पक्का गरे । अब उनी एक हजार गोलको ऐतिहासिक उपलब्धिबाट मात्र १५ गोल टाढा छन् ।

खेलपछि रोनाल्डोले सामाजिक सञ्जालमा लेखेका छन्, 'शानदार जित, उत्कृष्ट टोली प्रदर्शन। ह्याट्रिक गरेर टोलीलाई सहयोग गर्न पाउँदा खुसी छु!'

रोनाल्डो फुटबल इतिहासकै सर्वाधिक गोलकर्ता हुन् । उनी दोस्रो स्थानमा रहेका लियोनेल मेस्सी (९३६ गोल) भन्दा ४९ गोलले अगाडि छन् । अल नासर र पोर्चुगल राष्ट्रिय टोलीबाट लगातार खेलिरहेकाले उनले आफ्नो गोल संख्या अझै बढाउने निश्चित छ ।

खेलको १६औँ मिनेटमा फ्रान्सेली फरवार्ड जुलियन डोमिङ्गेसको गोलबाट अल खालुदले सुरुवाती अग्रता लिएको थियो । तर अल नासरका एन्जेलो ग्याब्रिएलले गोल गर्दै खेल बराबरीमा ल्याए । त्यसपछि साडियो मानेले अल नासरलाई अग्रता दिलाए पनि पहिलो हाफको इन्जुरी समयमा एन्टोइन एसोम्बाले गोल गर्दै अल खालुदलाई ३-३ को बराबरीमा पुर्याएका थिए । त्यसपछि भने रोनाल्डोले खेल पूर्ण रूपमा आफ्नो नियन्त्रणमा लिए ।

पूर्व रियाल मड्रिड स्टार रोनाल्डोले दुई गोल नजिकको दूरीबाट गरे भने एक गोल हेडरमार्फत गरे । सन् २०२३ मा साउदी अरब आएयता अल नासरका लागि यो उनको सातौँ ह्याट्रिक हो ।

यससँगै रोनाल्डोको करियरमा क्लब र राष्ट्रिय टोलीका लागि गरी कुल ६७ वटा ह्याट्रिक पुगेका छन् । (रियाल मड्रिडका लागि ४४, पोर्चुगलका लागि १०, अल नासरका लागि ७, म्यान्चेस्टर युनाइटेडका लागि ३ र युभेन्टसका लागि ३ ह्याट्रिक) ।

अल नासर र पोर्चुगलका उनका सहकर्मी जोआओ फेलिक्सले पनि यस खेलमा ४ वटा असिस्ट (गोलका लागि पास) मिलाएका थिए । यो जितसँगै अल नासर २८ अंकका साथ साउदी प्रो लिगको दोस्रो स्थानमा कायमै छ ।