विचौलियासँग उच्च पदस्थको कनेक्सन : संसद अधिवेशन बोलाउन रास्वपा सांसदको माग

काठमाडौँ । राष्ट्रिय स्वतन्त्र पार्टीका सांसद यज्ञमणि न्यौपानेले संसदको अधिवेशन बोलाउन माग गरेका छन् । 

Watch On

प्रधानन्यायाधीश, न्यायाधीशदेखि आईजीपीसम्मको कनेक्सन विचौलिया इनम सापकोटासँग देखिएको विषयमा छलफल गर्न प्रतिनिधि सभा बोलाउनुपर्ने सांसद न्यौपानेको धारणा छ । 

संसदमा न्यायाधीशको आचरण र न्यायालयको कामकारवाहीमाथि तिखो टिप्पणी गर्दै महाभियोग लगाउनुपर्नेसम्मको वकालत गर्दै आएका न्यौपानेले संसद बोलाउन माग गरेका हुन् । 

अधिवक्ता समेत रहेका सांसद न्यौपानेले संसदको छलफल विषय बनाउने भनेर प्रधानन्यायाधीश र न्यायाधीशमाथि महाभियोग लगाउनुपर्ने संकेत गरेका छन् । अब के हुन्छ भन्ने प्रश्नमा उनले संसदमा छलफल भनेर महाभियोगतर्फ संकेत गरेका छन् । 

उनले लेखेका छन्, 'सबैले सोध्नुहुन्छ अब के हुन्छ? के हुन्छ पछिको कुरा हो। तत्काल के गर्नुपर्छ मूलभूत कुरा हो। न्यायालयको अन्तिम थलो र शान्ति सुरक्षाको अन्तिम आशाको केन्द्र प्रहरीको शिर माथि नै प्रश्न उठेको बेला प्रतिनिधिसभा ले छलफल गर्ने विषय बन्नुपर्छ। सार्वभौमिकताको अन्तिम अस्त्र नै प्रतिनिधिसभा हो। यस्तो अवस्थामा प्रतिनिधिसभा अन्देख भएर बस्न मिल्दैन। यस्तै परिस्थितिका लागि  प्रतिनिधि सभाको अधिवेशन चालु नभएको अवस्थामा प्रतिनिधिसभाका एक चौथाई सदस्यले अधिवेशन आह्वानका लागि माग गरेमा १५ दिनभित्र बैठक बस्न सक्ने संवैधानिक प्रावधानको प्रयोग गर्नुपर्दछ ।'