राष्ट्रपतिसँग सभामुखको भेट, के भयो कुराकानी ?

काठमाडौं । राष्ट्रपति रामचन्द्र पौडेल र प्रतिनिधिसभाका सभामुख डोलप्रसाद (डीपी) अर्यालबीच भेटवार्ता भएको छ।

Watch On

राष्ट्रपति भवनमा बिहीबार भएको भेटमा संसद्को आगामी अधिवेशन आह्वान तथा संसद्लाई नियमित र प्रभावकारी रूपमा सञ्चालन गर्ने विषयमा छलफल भएको सभामुखको सचिवालयले जनाएको छ।

भेटमा राष्ट्रपति पौडेलले संसद्मा पर्याप्त बहस र छलफल हुनुपर्नेमा जोड दिएका थिए। संसद्मा जति धेरै विचारविमर्श हुन्छ, लोकतन्त्र त्यति नै बलियो हुने उनको भनाइ थियो। उनले सरकारका कामकारबाहीबारे समेत चासो राखेका थिए।

जवाफमा सभामुख अर्यालले राजनीतिक दलहरूसँगको छलफलबाट संसद् सञ्चालन गर्नुपर्ने सुझाव प्राप्त भएको जानकारी गराएका थिए।

भेटमा सभामुख अर्यालले सङ्घीय संसद्ले आयोजना गर्न लागेको अन्तरव्यवस्थापिका सङ्घ (आईपीयू) अन्तर्गतको दिगो विकाससम्बन्धी स्थायी समितिको एसिया–प्रशान्त क्षेत्रीय सम्मेलनबारे पनि राष्ट्रपतिलाई जानकारी गराएका थिए।

त्यसैगरी, तान्जानियाको अरुसामा सम्पन्न आईपीयूको १५३औँ महासभामा नेपालले प्रस्तुत गरेको जलवायुजन्य विपद्सम्बन्धी आपत्कालीन प्रस्ताव दुईतिहाइभन्दा बढी मतले पारित भएको विषयमा पनि उनले जानकारी गराएका थिए।

सभामुख अर्यालले सातवटै प्रदेशका सभामुख, उपसभामुख तथा प्रदेशसभाका पदाधिकारीसँग राष्ट्रपति र सभामुखको सामूहिक भेटघाट तथा छलफल गर्ने योजनाबारे पनि जानकारी गराएको सचिवालयले जनाएको छ।