विपी राजमार्ग पुनःनिर्माणमा जाइकाले थाल्यो काम, अन्य तीन खण्डमा पनि प्रगति

काभ्रेपलाञ्चोक । बाढीले क्षतिग्रस्त विपी राजमार्गको सिन्धुलीस्थित बर्खेखोला–पिप्ले सडकखण्ड पुनःनिर्माणको काम जापान अन्तर्राष्ट्रिय सहयोग नियोग (जाइका)ले सुरु गरेको छ। यससँगै राजमार्गका अन्य तीन खण्डमा पनि पुनःनिर्माणको काम अघि बढेको डिभिजन सडक कार्यालय भक्तपुरले जनाएको छ।

Watch On

कार्यालयका अनुसार बर्खेखोला–पिप्ले खण्ड पुनःनिर्माणका लागि जाइकासँग दुई अर्ब ६० करोड रुपैयाँमा सम्झौता भएको छ। डिभिजन सडक कार्यालयका प्रमुख सुमन योगेशले जाइकाले हालै काम सुरु गरेको जानकारी दिए।

यस्तै, पिप्लेदेखि काभ्रेपलाञ्चोकको भकुण्डेबेँशीसम्मको सडक पुनःनिर्माणमा ५२ प्रतिशत भौतिक प्रगति भएको छ। उक्त खण्डको विभिन्न भागमा तीन निर्माण कम्पनीले काम गरिरहेका छन्।

डालाबेँशीदेखि चारसयबेँशीसम्मको ८.५ किलोमिटर सडक पुनःनिर्माणको जिम्मा पाएको खानी–एवान–कमलजीत जेभीले २०८४ जेठ मसान्तसम्म काम सक्ने जनाएको छ। चारसयबेँशीदेखि भकुण्डेबेँशीसम्मको ११.८ किलोमिटर सडक लामा–नवकान्तिपुर जेभीले २०८४ असार १७ गतेभित्र सम्पन्न गर्ने गरी प्रक्रिया अघि बढाएको छ। त्यस्तै, पिप्लेदेखि डालाबेँशीसम्मको २.३ किलोमिटर सडकको काम उमा एन्ड कम्पनी–भण्डारी जेभीले २०८४ कात्तिक २६ गतेसम्म सक्ने लक्ष्य राखेको छ।

‘विपी राजमार्ग पुनःनिर्माणको काम लक्ष्यअनुसार नै भइरहेको छ,’ योगेशले भने।

२०८१ साल असोज दोस्रो साता रोशी खोलामा आएको बाढीले काभ्रेपलाञ्चोकको नमोबुद्धस्थित दाप्चाखोला पुलदेखि सिन्धुलीको नेपालथोकसम्मको २९ किलोमिटर सडक पूर्ण रूपमा क्षतिग्रस्त भएको थियो। त्यसमध्ये काभ्रेपलाञ्चोकतर्फको २५.११ किलोमिटर सडक तीन खण्डमा विभाजन गरी पुनःनिर्माण भइरहेको छ।

आगामी वर्षायामअघि निर्माणाधीन तीन खण्डमा एक तह कालोपत्रे गर्ने तयारी रहेको योगेशले बताए। उनका अनुसार बाढीबाट क्षतिग्रस्त सडकलाई डेडिकेटेड डबल लेनका रूपमा पुनःनिर्माण गरिँदैछ।

काभ्रेपलाञ्चोकतर्फका तीन खण्ड पुनःनिर्माणका लागि छुट्टाछुट्टै ठेक्का सम्झौता भएको छ। पिप्लेदेखि डालाबेँशीसम्मको सडकका लागि ६८ करोड ८० लाख, डालाबेँशीदेखि चारसयबेँशीसम्मका लागि एक अर्ब ४२ करोड र चारसयबेँशीदेखि भकुण्डेबेँशीसम्मका लागि एक अर्ब ३३ करोड रुपैयाँमा सम्झौता गरिएको छ।

यसैबीच, पुनःनिर्माण भएका सडकबाटै अहिले सवारी आवागमन भइरहेको छ। केही साँघुरा स्थानमा डाइभर्सन बनाएर दुईतर्फी आवागमन सञ्चालन गरिएको योगेशले बताए। चौकीडाँडा र पिन्थलीमा भिरालो भूभाग भएकाले सडक मर्मत तथा डाइभर्सनको व्यवस्था गरिएको छ। डालाबेँशी–पिप्ले खण्डमा पनि त्यस्तै व्यवस्था गरिएको छ।

हाल सडकमा जामको समस्या नरहेको र वर्षाका कारण माथिबाट लेदो वा पहिरो आएर सडक अवरुद्ध भए आधादेखि केही घण्टाभित्र खुलाउने गरी आवश्यक सामग्री व्यवस्थापन गरिएको कार्यालयले जनाएको छ।

नेपालको पूर्वी तथा मध्यपहाडी क्षेत्रलाई काठमाडौंसँग जोड्ने छोटो मार्गका रूपमा रहेको विपी राजमार्ग पुनःनिर्माणका लागि सरकारले आठ अर्ब ५० करोड रुपैयाँको स्रोत सहमति दिएको थियो। त्यसमध्ये काभ्रेपलाञ्चोकतर्फका तीन खण्डका लागि सात अर्ब ५० करोड र सिन्धुलीको एक खण्डका लागि एक अर्ब रुपैयाँ छुट्याइएको छ।

पुनःनिर्माण योजनाअन्तर्गत पाँचवटा पुललाई दुई लेनमा विस्तार गर्ने र तीन खण्डमा गरी ६.३ किलोमिटर आरसीसी पर्खाल निर्माण गर्ने योजना छ।

जापान सरकारको अनुदान सहयोगमा आर्थिक वर्ष २०५३/५४ देखि धुलिखेल–सिन्धुली–बर्दिबास जोड्ने १६० किलोमिटर लामो विपी राजमार्ग निर्माण सुरु भएको थियो। खण्डखण्डमा निर्माण सम्पन्न भएपछि २०७२ असार १८ गते जापान सरकारले नेपाल सरकारलाई राजमार्ग हस्तान्तरण गरेको थियो।