दिदीबहिनी नहुनेका पनि साझा थलो बन्यो बालगोपालेश्वर (तस्बिर कथा)

काठमाडौँ । दाजुभाइ र दिदीबहिनीबीच प्रेम, विश्वास र आत्मीयताको प्रतीक भाइटीका । निधारमा सप्तरङ्गी टीका, गलामा फूलका माला र मनभरि शुभकामना बोकेर दाजुभाइ दिदीबहिनीको घर पुगिरहेका बेला काठमाडौँको रानीपोखरीस्थित बालगोपालेश्वर मन्दिरमा पनि बिहानैदेखि बेग्लै चहलपहल देखिएको छ ।

Watch On

दिदीबहिनी नभएका दाजुभाइ र दाजुभाइ नभएका दिदीबहिनीका लागि भाइटीका लगाउने साझा थलो बनेको बालगोपालेश्वर मन्दिरमा बिहानैदेखि दर्शनार्थीको भीड लागेको छ । मन्दिर परिसरमा टीका लगाउन र दर्शन गर्न आउनेहरूको बाक्लो उपस्थिति छ ।

वर्षमा एकपटक भाइटीकाका दिन मात्रै खुल्ने यस मन्दिरमा काठमाडौँ उपत्यकासहित विभिन्न स्थानबाट श्रद्धालुहरू पुग्ने गरेका छन् । दिदीबहिनी वा दाजुभाइ नहुँदा भाइटीकाको परम्पराबाट टाढिन नपरोस् भन्ने धार्मिक तथा सांस्कृतिक विश्वासले पनि यस मन्दिरको विशेष महत्व छ ।

मन्दिर परिसरमा कतै टीका लगाउने तयारी, कतै फूलमाला र प्रसादको चटारो त कतै एकअर्कालाई शुभकामना साटासाट गरिरहेका दृश्य देखिन्छन् । पारिवारिक सम्बन्धको आत्मीयता र चाडपर्वको उल्लासले रानीपोखरी परिसर बिहानैदेखि उत्सवमय बनेको छ ।

भाइटीका केवल निधारमा रङ पोत्ने पर्व होइन, दाजुभाइ तथा दिदीबहिनीबीचको माया, भरोसा र जीवनभरको साथको प्रतीक पनि हो । यही आत्मीयताको भावलाई फराकिलो बनाउँदै बालगोपालेश्वर मन्दिरले दिदीबहिनी वा दाजुभाइ नहुनेहरूलाई पनि भाइटीकाको उत्सवमा जोड्ने सांस्कृतिक परम्परालाई निरन्तरता दिँदै आएको छ ।