ट्रम्पको बिबिसीविरुद्धको पाँच अर्ब डलरको मुद्दा अघि बढ्ने

वासिङ्टन । अमेरिकी राष्ट्रपति डोनाल्ड ट्रम्पले बेलायती प्रसारण संस्था बिबिसीविरुद्ध दायर गरेको पाँच अर्ब अमेरिकी डलरको मानहानिसम्बन्धी मुद्दा अघि बढ्ने भएको छ । अमेरिकी सङ्घीय अदालतले मुद्दा खारेज गर्न बिबिसीले गरेको माग अस्वीकार गरेपछि मुद्दाको सुनुवाइ प्रक्रिया अघि बढ्ने भएको हो ।

Watch On

ट्रम्पले सन् २०२१ जनवरी ६ मा अमेरिकी संसद् भवन क्यापिटलमा भएको आक्रमणअघि दिएको भाषणलाई बिबिसीले आफ्नो वृत्तचित्रमा भ्रामक ढङ्गले सम्पादन गरेको आरोप लगाएका छन् । भाषणका विभिन्न अंश जोडेर आफूले समर्थकलाई हिंसामा उक्साएको देखाइएको उनको दाबी छ ।

फ्लोरिडाका सङ्घीय न्यायाधीश जेफ्री टी कुन्जले ट्रम्पको मानहानिसम्बन्धी दाबीलाई सुनुवाइका लागि अघि बढाउन अनुमति दिएका हुन् । यद्यपि, फ्लोरिडाको उपभोक्ता संरक्षण कानुनअन्तर्गत गरिएको अर्को दाबी भने उनले खारेज गरेका छन् ।

विवादित वृत्तचित्रको सम्पादनप्रति बिबिसीले यसअघि नै माफी मागिसकेको छ । तर सम्पादनका कारण ट्रम्पलाई वास्तविक क्षति पुगेको भन्ने दाबीलाई संस्थाले अस्वीकार गर्दै आएको छ ।

अदालतको पछिल्लो निर्णयपछि ट्रम्पले यसलाई आफ्नो ‘ठूलो विजय’ भन्दै अमेरिकी जनतालाई धोका दिन खोज्नेहरूविरुद्ध आफू लडिरहने बताएका छन् ।

यसअघि अदालतले ट्रम्पलाई डिसेम्बर ११ भित्र मुद्दासम्बन्धी बयान दिन आदेश दिएको थियो । तोकिएको समयमा बयानका लागि उपस्थित नभए मुद्दा खारेज हुन सक्ने चेतावनीसमेत अदालतले दिएको छ ।