भीमफेदी दुर्घटनामा एउटै टोलका पाँच परिवारले सदस्य गुमाए, पीडितको अभिभावकत्व लिन रास्वपाको आग्रह

काठमाडौं । मकवानपुरको भीमफेदीमा भएको माइक्रोबस दुर्घटनामा एउटै टोलका पाँच परिवारका सदस्यले ज्यान गुमाएको भन्दै राष्ट्रिय स्वतन्त्र पार्टी (रास्वपा) ले पीडित परिवारको अभिभावकत्व लिन सरकारसँग आग्रह गरेको छ।

Watch On

बिहीबार बिहान भएको दुर्घटनामा १० जनाको मृत्यु र ६ जना घाइते भएको घटनाप्रति पार्टीले दुःख व्यक्त गरेको छ।

रास्वपाका प्रवक्ता जगदीश खरेलले प्रेस विज्ञप्ति जारी गर्दै दुर्घटनाको खबरले पार्टी स्तब्ध र मर्माहत भएको बताएका छन्।

काठमाडौंमा व्यवसाय तथा रोजगारीमा संलग्न परिवारका सदस्यहरू एउटै गाडी रिजर्भ गरेर छठ पर्व मनाउन घर फर्किने क्रममा दुर्घटना भएको विज्ञप्तिमा उल्लेख छ। दुर्घटनाले सर्लाहीको चक्रघट्टा गाउँपालिका–४, सुन्दरपुर टोलका धेरै परिवार र आफन्तलाई एकैपटक शोकमा डुबाएको पार्टीले जनाएको छ।

‘एउटै टोलका पाँच परिवारसम्मका सदस्य गुमाउनुपरेको यस घटनाले एउटा गाउँ र समुदायमा अपूरणीय क्षति पुर्‍याएको छ,’ विज्ञप्तिमा भनिएको छ।

रास्वपाले दुर्घटनामा ज्यान गुमाउनेहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारमा समवेदना व्यक्त गरेको छ। साथै, घाइतेहरूको शीघ्र स्वास्थ्यलाभको कामना गरेको छ।

पार्टीले घाइतेहरूको प्रभावकारी तथा निःशुल्क उपचार, मृतकको पहिचान र शव व्यवस्थापनमा आवश्यक सहजीकरण तथा शोकाकुल परिवारलाई तत्काल राहत र मानवीय सहयोग उपलब्ध गराउन सरकारसँग आग्रह गरेको छ।

पीडित परिवारको अभिभावकत्व ग्रहण गर्दै राहत, सहयोग र सहजीकरणमा संवेदनशील तथा जिम्मेवार रूपमा प्रस्तुत हुन सरकारलाई आग्रह गर्दै रास्वपाले आगामी दिनमा यस्ता दुर्घटना न्यूनीकरणका लागि प्रभावकारी र दीर्घकालीन कदम चाल्नुपर्नेमा जोड दिएको छ।

‘सडक दुर्घटना केवल एउटा परिवारको निजी पीडा मात्रै होइन, यो राज्यको यातायात सुरक्षा प्रणाली र सार्वजनिक जवाफदेहितासँग पनि जोडिएको गम्भीर विषय हो,’ विज्ञप्तिमा उल्लेख छ।

रास्वपाले दुःखद घडीमा पीडित परिवार र सिंगो सुन्दरपुरवासीको साथमा रहेको प्रतिबद्धतासमेत व्यक्त गरेको छ।