पश्चिम नवलपरासी । आफूहरुले उत्पादन गरेको दुध बिक्रि नभएको भन्दै पश्चिम नवलपरासीका किसान आन्दोलित भएका छन । उनीहरुले राजमार्गमै दुध पोखेर १ घण्टा पूर्वपश्चिम राजमार्ग बन्द गरेर आन्दोलन गरेका हुन् ।

पश्चिम नवलपरासीमा दैनिक ३० हजार लिटर दुध उत्पादन हुन्छ । जुन काठमाडौँ, पोखरालगायतका स्थानमा बिक्रि हुँदै आएको तर पछिल्लो समय आफूहरुको दुध बिक्रि नभएको भन्दै किसानहरु आन्दोलित भएका हुन् । देशमा नाकाबन्दी वा कुनै हडताल नभएपनि आफूहरुको दुध बिक्रि नभएको भन्दै उनीहरुले सडकमै दुध पोखेर आन्दोलनमा उत्रिएका हुन् । दुधले उचित बजार नपाउँदा आफूहरु पीडामा परेको र सरकारले आफूहरुको समस्या समाधानमा ध्यान नदिएको उनीहरुको आरोप छ ।

कृषिप्रधान देशमा किसाननै पीडामा हुनु समस्या रहेको उनीहरुको दाबी छ । ‘पराल, घाँस, चोकड, ब्रान्ड लगायतका सामाग्री नगदमै खरिद गर्नुपर्ने तर आफूहरुको दुध बिक्रि नहुँदा हामी कहिलेसम्म पीडाले मर्नुपर्ने ?’, आन्दोलित किसानहरु प्रश्न गर्छन् । त्यस्तै उनीहरुले सरकार भारतबाट दुध आयात गर्न सक्ने तर आफ्नै किसानको दुध खरिद गर्न आनाकानी गरेको र आफूहरुलाई सरकारले नै पीडा दिएको बताएका छन् । ‘दिनरात भारतबाट दुध आयात गर्ने अनि नेपालकै उत्पादन खरिदमा विभिन्न बहाना बनाउँदै समयमा भुक्तानी समेत नदिने ? हामीलाई सरकारले मार्न खोजेको हो ?’, उनीहरु प्रश्न गर्छन् ।

आन्दोलनमा उत्रिएका किसानले बिहिबारको बन्द प्रतिकात्मक आन्दोलन मात्र भएको र आगामी दिनमा सरकार आफूहरुको माग पूरा गर्न सकरात्मक नभए आन्दोलनका कार्यक्रम चर्काउने चेतावनी दिएका छन् ।