काठमाडौँ । सुन तस्करी प्रकरणमा त्रिभुवन विमानस्थल भन्सार कार्यालयका तत्कालीन प्रमुख भन्सार प्रशासक अरुण पोखरेल दोषी देखिएका छन् । 

६० किलो सुन र भेप प्रकरणबारे जाँचबुझ गर्न गठित उच्चस्तरीय आयोगले बुझाएको प्रतिवेदनमा सहसचिव पोखरेलसहित ३ जनालाई कारबाही गर्न सिफारिस गरिएको छ । 

‘तत्कालीन भन्सार प्रशासक अरुण पोखरेल, उपसचिवद्वय श्रीधर टण्डन र मुक्ति श्रेष्ठलाई कारबाही गर्नू,’ पूर्व न्यायाधीश डिल्लीराज आचार्य नेतृत्वको आयोगको सिफारिसमा भनिएको छ । 

माओवादी नेताहरू निकट पोखरेल सहसचिव भएको छोटो समयमै निकै आकर्षक ठाउँहरूमा पोस्टिङ पाएका व्यक्ति हुन् । सिन्धुपाल्चोकको प्रमुख जिल्ला अधिकारी रहेको पोखरेललाई जनार्दन शर्माले देशकै सबै भन्दा ठूलो वीरगन्ज भन्सारको जिम्मेवारी दिएका थिए । वीरगञ्जमा छोटो समय बसेका उनी लगत्तै लगत्तै देशकै अर्को महत्वपूर्ण भन्सार कार्यालय त्रिभुवन विमानस्थलको प्रमुख भएका थिए । 

सुन प्रकरणमा विवादित बनेपछि लामो समय अर्थ मन्त्रालयको जगेडामा बसेका उनलाई सरकारले सुदूरपश्चिम प्रदेशको आर्थिक मामिला मन्त्रालयको सचिव बनाएर पठाएको थियो । गत १७ फागुनमा सरकारको उनको सरुवा गृह मन्त्रालयमा गरेको छ । 

आयोगले उनलाई सुन तस्करी रोक्न प्रभावकारी भूमिका खेल्न नसकेको भन्दै विभागीय कारबाहीको सिफारिस गरेको छ ।