प्रेम प्रस्ताव अस्वीकार गर्दा हत्या, मृतकको फेसबुकमा हत्याराले नै गरेका थिए बेहुली भएको फेक फोटो पोस्ट

काठमाडौँ । गत फागुन २४ गते काठमाडौँको गोकर्णेश्वर नगरपालिका वडा नम्बर ३ तारेभिर स्थित शिवपुरी जंगलमा शरीरको भाग पुरिएको र २ ओटा हात मात्र देखिएको शव फेला पर्यो । शव फेला परेको सूचना पाउने वित्तिकै नेपाल प्रहरीको काठमाडौँ उपत्यका अपराध अनुसन्धान कार्यालयले विशेष टोली परिचालन गरेको थियो । घटनाको अनुसन्धानपछि जुन बाहिर आयो त्यो काल्पनिक चलचित्रको कहानी भन्दा अझ भयानक छ । 

Watch On

गोकर्णेश्वर नगरपालिका वडा नम्बर ३ की १८ वर्षीया सुष्मा लामा माघ २२ गते घरबाट कलेज जानका लागि निस्केकी थिइन् । तर उनी बेलुकी घर फर्किनन् । परिवारले सो दिन उनलाई सम्पर्क गर्ने धेरै प्रयास गरे । संभावित सबै ठाउँमा खोजे, बुझे तर केही पत्तो लागेन । 

भोलिपल्ट अर्थात माघ २३ गते सुष्माले चलाउने सुष्मा मंगोलियन नाम गरेको फेसबुक अकाण्टमा एउटा पोस्ट आयो । जहाँ बेहुला बेहुलीको फोटो अपलोड गरेर क्याप्सन लेखिएको थियो, ‘सरी सबैजनालाई, तीन दिनमा म आउँछु’ । उक्त पोष्टमा बेहुलाको फोटोमा इमोजी राखिएको हुन्छ भने सुष्मालाई बेहुलीको बस्त्रमा देखिन्छ । 

परिवारले माघ २५ गते सुष्मा हराएको भन्दै प्रहरी बृत्त बौद्धमा खोजतलासको लागि निवेदन दिन्छन् । परिवारले निवेदन दिएको भोलिपल्ट सुष्माको दिदि नाता पर्ने बिन्दा तामाङलाई सुष्माको नम्बरबाट म्यासेज आउँछ । जहाँ लेखिएको हुन्छ, ‘किन के को पुलिस रिपोर्ट गरेको ? म तीन दिनमा आउँछु भन्दा भन्दै कस्तो मान्छेहरु रैछ । अब आउँछु भन्ठानिराहोला । अब मलाई बच्चा पनि भइसक्यो होला । हामीलाई जेलमा हालेर के पाउँछ ? अब टाढा गएर बस्ने हो कसैले के को पनि चिन्ता लिनु पर्दैन हाम्रो ।’

परिवार सुष्माले बिहे नै गरेको निष्कर्षमा पुग्छन् । उजुरी पछिको म्यासेजमा अब टाढा गएर बस्ने र कसैले चिन्ता लिुपर्दैन भनिएको थियो । तर परिवार सुष्मा फर्कनेमा आशावादी थिए । एक महिना बित्छ । सुष्माको कुनै खबर आउँदैन । 

फागुन २४ गते शिवपुरीको जंगलमा शव भेटिएको प्रहरीले सूचना पाउँछ । अनुसन्धानको क्रममा उक्त शव सुष्माकै भएको खुल्छ । बिहे गरेँ भनेकी सुष्माको शव भेटिएपछि परिवार असह्य पीडामा डुब्छ । बिहे गरेँ भन्ने खबर पठाएकोे सुष्माको गाडिएको अवस्थामा शव भेटिनुले घटना सामान्य नभएको निचोडमा प्रहरी पुग्छ । प्रहरीको अनुसन्धानपछि एउटा डरलाग्दो अपराध बाहिर आउँछ ।

यस्तो छ प्रहरी अनुसन्धानबाट खुलेको डरलाग्दो तथ्य

मृतक सुष्मा लामालाई रुपेन्द्र लामा ना गरेका सुष्माकै गाउँका २१ वर्षीय युवकले विगत ८ महिनादेखि मन पराउँदै आएका थिए । प्रहरीका अनुसार उनीहरु विगत १÷२ वर्षदेखि सँगै घाँस काट्न, बाख्रा चराउन जाने गर्थे । तर उनीहरुको फोन वा म्यासेजमा भने कुरा हुँदैनथ्यो । भेटका क्रममा मात्र उनीहरुबिच बोलचाल हुन्थ्यो । रुपेन्द्रले सुष्मालाई पटक पटक प्रेम प्रस्ताव समेत राखेका थिए । तर सुष्माले अस्वीकार गरेकी थिइन् । २२ गते पनि सुष्मा कलेज हिँडेको समयमा रुपेन्द्रले प्रेम प्रस्ताव राखेका थिए । तर सुष्माले पहिले जस्तै अस्वीकार गरिन् । त्यसपछि रुपेन्द्रले घाँटी थिचेर अचेत बनाएको बयान दिएका छन् । रुपेन्द्रले सुष्माले लगाएको टाई र जुत्ताको तनाले घाँटी कसेको र पेटीले हात बाँधेर खाल्डोमा पुरेको बयान प्रहरीसमक्ष दिएका छन् । प्रहरीका अनुसार रुपेन्द्रले ४ दिनअघि खाल्डो खनेका थिए । उनले ८ दिनदेखि सुष्मालाई बाटोमा ढुकेको समेत बयानका क्रममा बताएका छन् । 

सुष्मालाई खाल्डोमा पुरेपछि उनको फोन र किताब समेत रुपेन्द्रले नै लगेका थिए । त्यसपछि उनले भोलिपल्ट गुगलबाट बेहुला बेहुलीको फोटो तानेर त्यसमा सुष्माको टाउको जोडेर बेहुलाको अनुहारका इमोजी राखी सुष्माकै फेसबुकमा अपलोड गरिदिएका थिए । त्यसपछि परिवारले खोजीको लागि उजुरी दिएको कुरा थाहा पाएपछि रुपेन्द्रले नै दिदि बिन्दालाई म्यासेज गरेको अनुसन्धानबाट खुलेको छ । प्रहरीले रुपेन्द्रको कोठाबाट सुष्माको मोबाइल फोन, उनको कापी किताब र खाल्डो खन्न प्रयोग गरेको कुटो समेत बरामद गरेको छ ।