सुन तस्करी प्रकरणमा पक्राउ परेका कृष्ण महरा हाजिर जमानीमा रिहा

काठमाडाैँ । भेपमा भएको सुन तस्करी प्रकरणमा पक्राउ परेका माओवादी केन्द्रका उपाध्यक्ष तथा पूर्व सभामुख कृष्णबहादुर महरालाई हाजिर जमानीमा छाेडिएकाे छ। सरकारी वकिल कार्यालय काठमाडौँको सहमतिमा सीआईबीले उनलाई हाजिर जमानीमा छोडेको हो ।  विभिन्न रोगको औषधी सेवन गरिरहेका कारण उनलाई छाेडिएकाे जिल्ला सरकारी वकिलको कार्यालयले जनाएको छ । 

Watch On

विद्युतिय चुरोट भेपमा भएको ९ किलो सुन तस्करी प्रकरणमा गत सोमबार कपिलवस्तुबाट पक्राउ परेका महरालाई जिल्ला अदालत काठमाडौँले ४ दिन हिरासतमा राखेर अनुसन्धान गर्न आदेश दिएको थियो । 

त्यस्तै अदालतले महराको स्वास्थ्य अवस्थालाई कारण देखाउँदै अस्पताल भर्ना गर्न आदेश दिएको थियो । पक्राउ परेपनि अस्पतालमा राखिएका उनलाई शुक्रबार सीआईबी र सरकारी वकिलको कार्यालयले बयान लिएपछि छाेडिएकाे हाे। 

भेपमा लुकाएर तस्करी गरिएको सुन प्रकरणमा महराको संलग्नता देखिएको यसअघिको सीआईबीको प्रतिवेदनमा उल्लेख थियो । त्यस्तै सुन प्रकरणमा छानबिन गर्न बनेको उच्चस्तरीय आयोगले पनि उनलाई कारबाही गर्न सिफारिस गरेको थियो । आयोगको प्रतिवेदनपछि  उपप्रधान एवं गृहमन्त्री रवि लामिछानेले संलग्न सबैलाई कारबाही गर्न प्रहरीलाई निर्देशन दिएका थिए ।

२०७९ पुस १० गते फ्लाई दुबईबाट चिनियाँ नागरिक ली हानसङले सुन भरेर ल्याएका ७ सय ३० वटा विद्युतीय चुरोट भेप भन्सारले जफत गरेको थियो । सोही प्रकरणमा ली हानसङ कृष्णबहादुर महरासँग ११ पटकसम्म फोन सम्पर्क भएको देखिएको थियो । 

सोही प्रकरणमा पक्राउ परेका महराका छोरा राहुल महरा अहिले पुर्पक्षमा थुनामा छन् ।