गृहमन्त्रीसामु डाँको छोडेर रुँदै रामहरि श्रेष्ठ पत्नी भन्छिन्, ‘न्यायको आश पलायो तर असुरक्षित महसुस गरेको छु’

काठमाडाैँ । तत्कालीन विद्राही माओवादीद्वारा हत्या गरिएका कोटेश्वरका व्यापारी रामहरी श्रेष्ठकी पत्नीले रमिलाले उपप्रधान तथा गृहमन्त्री रवि लामिछानेलाई भेटेकी छिन् । सिंहदरबारस्थित गृहमन्त्रीसँगको भेटमा डाको छोडेर रुँदै उनले न्यायको आश पलाएको बताएकी छिन् । 

पतिको हत्या अभियोग लागेका माओवादी पूर्वकमाण्डर कालीबहादुर खामलाई पक्राउ गरि पूर्पक्षका लागि थुनामा पठाउन अदालतले आदेश दिएपछि न्याय पाउनेमा आशा पलाएको उनले बताइन् । ‘न्यायको आश मरिसकेको थियो । तपाईंबाट आशा पलाएको छ ।’, उनले थपिन, ‘श्रीमान फिर्ता त पाउँदिन तर न्याय पाउँ, अपराधी न उम्कियोस् ।’

त्यस्तै उनले पछिल्लो समय श्रीमान हत्यामा संलग्न रहेकाहरु पक्राउ पर्न थालेपछि आफूलाई धम्की आउन थालेको बताएकी छिन् । गृहमन्त्री लामिछानसँग सुरक्षा माग गर्दै उनले भनिन्, ‘असुरक्षित महसुस गरेको छु । डर धम्की आएका छन् । सुरक्षा प्रदान गरिदिनुहोस् ।’

भेटका क्रममा गृहमन्त्री लामिछानलेले पद र ओहोदाका कारण कसैले छुट नपाउने र सबैलाई कानुनअनुरुप कारबाही हुने विश्वास दिलाएका छन् । ‘पद र राजनीतिक ओहोदाका कारण कसैले छुट पाउँदैनन् ।’, श्रेष्ठ पत्नी रमिलासँग उनले भने, ‘तपाईँले न्याय पाउनुहुन्छ । ढुक्क हुनुस्, कानुनभन्दा माथि कोही हुन्न ।’

त्यस्तै भेटका क्रममा रामहरी श्रेष्ठका छोरा रोहनले अपराध गर्नेहरुले पद र पावरका भरमा उन्मुक्ति पाउँदै आएका र यो मुद्दामा पनि त्यस्तै हुन नदिन गृहमन्त्रीलाई आग्रह गरेका छन् । 

२०६५ साल वैशाख १५ गते व्यवसायी रामहरी श्रेष्ठको अपहरणपछि हत्या भएको थियो । श्रेष्ठको हत्याका प्रमुख योजनाकार भनिएका १५ वर्षदेखि फरार कालीबहादुुर खाम गत चैत २० गते पक्राउ परेका थिए । 

नेकपा माओवादीको लडाकुका पूर्व डिभिजन कमाण्डर र हाल सुरक्षा विभागका सदस्य समेत रहेका उनलाई चितवन जिल्ला अदाललते पूर्पक्षका लागि थुनामा पठाउन आदेश दिएको छ ।