चीनबाट सुुन तस्करी गर्ने गिरोहका ७ जना डेढ केजी सुन सहित पक्राउ

काठमाडौँ । काठमाडौँ उपत्यका अपराध अनुसन्धान कार्यालयले काठमाडौको न्युरोडबाट १ केजी ७६८.२५ ग्राम सुन र १ करोड ४३ लाख ६० हजार रूपैयाँ नगदसहित ७ जनालाई पक्राउ गरेको छ ।

Watch On

काठमाडौँ उपत्यका अपराध अनुसन्धान कार्यालयको टोलीले बरामद सुन र रकमसहित पक्राउ परेकाहरूलाई शुक्रबार सार्वजनिक गरेको छ । 

काठमाडौ महानगरपालिका वडा नम्बर २४ दुछेंननी टोलमा केहि व्यक्तिहरुले अवैध सुन कारोबार गरिरहेको भन्ने गोप्य सुचनाको आधारमा खटिएको टोलीले १ केजी ७६८.२५ ग्राम सुन र १ करोड ४३ लाख ६० हजार रूपैयाँ नगदसहित ७ जनालाई पक्राउ गरेको अपराध अनुसन्धान कार्यालयका डिएसपी सुरक्षा केसीले जानकारी दिए । पक्राउ पर्नेमा दार्चुला महाकाली नगरपालिका वडा नं ३ टाँटे बस्ने ४७ वर्षीय गणेश दत्त बडू र दार्चुलाकै २१ वर्षीय आयुष बडू, झापा बिर्तामोडका ३० वर्षीय दिनेश खरेल र २२ वर्षीय भरतराज खरेल रहेको छन् । 

त्यस्तै भारत महाराष्ट्रका ३७ वर्षिया अमोल बिभुते, १८ बर्षिय ऋषिकेश प्रकाश बिभुते र १८ बर्षिय नै गणेश सतिश बाल्टे पक्राउ परेको डिएसपी केसीले जानकारी दिए । 

पक्राउ परेका गणेश दत्त बडू यसअघि २०७४ भदौ १९ गते ठमेल क्षेत्रबाट बरामद भएको ८८ केजी सुन प्रकरणमा पनि जोडिएक व्यक्ति रहेको प्रहरीले जनाएको छ । प्रहरीले पछिल्लो घटनामा गिरोहले चीनबाट तस्करी गरेर सुन ल्याएको प्रारम्भिक निचोड निकालेको छ ।