सबै कुरा

श्रमिकका समस्या समाधानका लागि श्रमाधान कल सेन्टर सञ्चालनमा, यसरी गर्नुहोस् गुनासो

सिधाकुरा

बुधबार, वैशाख १९, २०८१

श्रमिकका समस्या समाधानका लागि श्रमाधान कल सेन्टर सञ्चालनमा, यसरी गर्नुहोस् गुनासो

काठमाडाैँ । श्रम, रोजगार तथा सामाजिक सुरक्षा मन्त्रालयले श्रमाधान कल सेन्टर सञ्चालनमा ल्याएको छ । मन्त्रालयले श्रम तथा रोजगारसँग सम्बन्धित सम्पूर्ण जिज्ञासा एंवम् गुनासो सुन्न र समस्यालाई तत्काल सम्बोधन गर्नका लागि श्रमाधान कल सेन्टर सञ्चालनमा ल्याएको हो ।

श्रम, रोजगार तथा सामाजिक सुरक्षा मन्त्री डोलप्रसाद अर्यालले बाध्यताले वैदेशिक रोजगारीमा जाने श्रमिकका समास्यालाई प्राथमिकता दिएर श्रमाधान कल सेन्टर सञ्चालन ल्याएको बताएका छन् । ‘मन्त्रीका रुपमा मन्त्रालय प्रवेश गरेको करिब २ महिना भयो म र मेरो टिमको सम्पूर्ण इफोर्ट श्रमिकका लागि काम गर्नेमा नै केन्द्रित छ । त्यसकै प्रतिफल हो श्रमाधान कल सेन्टर ।’

आफूलाई पहिले कल सेन्टरले श्रमिकका सम्पूर्ण समस्या समाधान गर्न सहयोग गर्छ भन्ने लागेको तर त्यसले समस्या समाधान गर्न नसकेपछि आफूहरुले अर्को विकल्प निकालेको मन्त्री अर्यालले बताएका छन् । ‘श्रमाधान मन्त्रालयको यस्तो वृहत र व्यवहारिक योजना हो, जसले नागरिकको श्रम र रोजगारसम्बन्धी बहुआयामिक एकद्वार प्रणालीद्वारा सम्बोधन गर्ने योजना राखेको छ ।’, मन्त्री अर्यालले भने ।

यसअघि नागरिकले आफूले श्रमसँग अनेक समस्या लिएर विभिन्न निकाय धाउनुपर्ने बाध्यता रहेको र मन्त्रालयले श्रमाधानको संचालन गरेसँगै अब सम्पूर्ण श्रमिकले एकै स्थानबाट सम्पूर्ण समास्याका समाधान पाउने मन्त्रालयको दाबी छ ।

श्रमिकहरुले श्रमाधानमा गुनासो गर्नका लागि वैदेशिक रोजगार बोर्डमा रहेको कल सेन्टरमा पुगेर आफ्नो समस्या राख्न सक्छन् भने अन्य विभिन्न माध्यमबाट समेत गुनासो गर्नसक्ने मन्त्रालयले व्यवस्था गरेको छ । ‘नागरिकले विद्युतीय माध्यम (ट्याब्लेट, टेलिफोन, मोबाइल, स्मार्ट टिभी, स्मार्ट वाच) लिखित, मौखिक, ध्वनि, श्रब्य, श्रब्यदृश्य आदि माध्यमको प्रयोग गरेर श्रमाधानमा गुनासो, जिज्ञासा, समस्या र सुझाव सम्प्रेषण गर्न सक्नेछन् । सामाजिक सञ्जाल (फेसबुक, ह्वाट्स्एप, भाइबर, इमो, इन्स्टाग्राम, इमेल, एक्स, सिग्नल) बाट पनि गुनासो दर्ता गर्न सक्नेछन् ।’, मन्त्री अर्यालले जानकारी गराए ।

श्रमाधान कल सेन्टरमा प्राप्त भएका गुनासोलाई श्रम मन्त्रालय र अन्तर्गतका निकायहरुमा सिफारिश गरिने र गुनासोको तत्काल सम्बोधन गर्नका लागि सम्बन्धित निकायमा तोकिएका फोकल पर्सनले जिम्मेवार भएर लाग्ने मन्त्रालयले जनाएको छ । त्यस्तै समस्या टिपाएदेखि नै समस्याका बारेमा कल सेन्टरकै कर्मचारीले त्यसबारे प्रगति विवरण निरन्तररुपमा श्रमिकलाई जानकारी गराइने मन्त्रालयले जनाएको छ ।