काठमाडौँ । कान्तिपुर मिडिया ग्रुपका अध्यक्ष कैलाशप्रसाद सिरोहियाले आफ्नो नागरिकताका विषयमा भ्रमपूर्ण सामाग्री प्रचार भएको दाबी गरेका छन् । 

सिधाकुरामा वैशाख १८ गते प्रकाशित ‘कान्तिपुरका सञ्चालक कैलाश सिरोहियाको नागरिकतामै कैफियत’ शिर्षकको समाचार र उक्त समाचारको भिडियो सामग्रीले आफ्नोबारे भ्रमपूर्ण प्रचार भएको सिरोहियाले सिधाकुरालाई शनिबार प्रेशित गरेको खण्डनमा उल्लेख छ ।

वैशाख १६ गते सिरोहियाको नागरिकतामा कैफियत रहेको  भन्दै जिल्ला प्रहरी कार्यालय धनुषामा जाहेरी दर्ता भएपछि १८ वैशाखमा सिधाकुराले उक्त समाचार प्रकाशन/प्रसारण गरेको थियो । 

जिल्ला प्रहरी कार्यालय धनुषाका प्रमुख एसपी भुवनेश्वर तिवारीकाअनुसार सो जाहेरीमाथि अनुसन्धान अघि बढेको छ । तर, सिरोहियाले भने आफ्नो नागरिकताको विवादलाई अन्यत्रै प्रसंगसँग जोडेर सिधाकुरालाई खण्डन पठाएका छन् ।

सिरोहियाले सिधाकुरालाई पठाएको खण्डनमा सिधाकुराले १४ वैशाखमा प्रकाशित गरेको समाचार र त्यस सन्दर्भमा अदालतमा विचाराधिन विषयसँग जोडेका छन् ।

जबकी  उनको नागरिकतामा रहेको कैफियतबारे १६ वैशाखमा धनुषामा जाहेरी परेको हो । सिरोहियाले प्रेसित गरेको खण्डनमा आफ्नो फोटो र नागरिकताबारे भ्रम प्रसार गरी आफ्नो तस्वीरमा ‘अ फेक सिटिजन’ भनी लेवल गरिएकामा आपत्ति जनाएका छन् । 

‘तपाईंहरुको अनलाइन तथा युट्युब च्यानलबाट मेरो नागरिकताबारे भ्रम प्रसार गरी मेरो तस्बिरमा ‘अ फेक सिटिजन’ भनेर ‘लेबलिङ’ गरेकामा मेरो गम्भीर आपत्ति छ । देशको सार्वभौम नागरिकलाई ‘फेक सिटिजन’ भनिएकाले मेरो मानमर्दन मात्र भएको छैन, नागरिकतासम्बन्धी देशको कानुन र राज्यका निकायले जारी गरेको आधिकारिक दस्तावेजलाई पनि अपमान भएको छ,’ सिरोहियाले हस्ताक्षर गरेर प्रेसित गरेको खण्डन पत्रमा भनिएको छ, ‘नागरिक, सरकारी दस्तावेज र राज्यको कानुनमाथि धावा बोल्ने काम भएकाले माफी मागी, भ्रमपूर्ण सामग्रीको खण्डन प्रकाशित गर्नुहुन अनुरोध गर्दछु ।’

यस्तो छ सिरोहियाले प्रेसित गरेको खण्डनको निवेदन