भारतको रक्सौलबाट हुन्डीकाे ६० लाख नेपाली रुपैयाँ बरामद

वीरगंज । हुन्डी तथा सुन कारोबारसँग संलग्न ६० लाख नेपाली रुपैँया भारतीय प्रहरीले नेपाल भारतको सीमावर्ती सहर रक्सौलबाट बरामद गरेको छ । 

Watch On

सिमावारपार हुने आपराधिक गतिविधि नियन्त्रणका लागि गोप्य सूचनाको आधारमा भारतीय प्रहरीले रक्सौलको नागारोडस्थित गुडको कारोबार गर्ने ध्रुप प्रसादको घरबाट उक्त रकम सहित भारतीय रुपैयाँ बरामद गरेको हो । 

आइतबार दिउसो पूर्वी चम्पारण मोतिहारीका सहायक प्रहरी अधीक्षक शिखर चौधरीको नेतृत्वमा रहेको प्रहरीले रक्सौलमा बसेर नेपाल र भारतमा हुन्डी तथा सुनका लागी रकम आदानप्रदान गराउने ध्रुप प्रसाद भन्ने व्यक्तिको घरमा छापामारी गरि ३४ लाख ३४ हजार ५ सय रुपैयाँ भारतीय रुपैयाँ र ६० लाख १८ हजार नेपाली रुपैयाँ बरामद गरेको मोतिहारी अधिक्षकको कार्यालयले जनाएको छ । 

ग्रामीण भेगमा जोखिम हुदाँ नेपाल भारतको मुख्य नाका वीरगंज भन्सार कार्यालय भएरै प्रहरीको सेटिङमै हुण्डी कारोबारी हुने गरेको स्रोत बताउँछन् । सुरुवातमा प्रहरीले हुन्डीको रकम बरामद गरेपनि पछिल्लो समय हुन्डी कारोबारीलाई समाउन सकेको छैन् । मोटरसाइकलको भाइजर, सिटमुनि फल्स बटम बनाई दिनकै करोड बढी हुन्डी कारोबार हुने गरेको देखिन्छ । भारतमा शनिवार हुने लोकसभा निर्वाचनलाई दृष्टगत गर्दै मतदान प्रभावित पार्न रकमको चलखेल गर्न सक्ने सूचनाको आधारमा भारतीय प्रहरीले पहिलो पटक ठुलो परिमाणमा नेपाली रुपैयाँ बरामद गरेको छ । 

स्रोतका अनुसार सीमावर्ती शहर रक्सौल र वीरगंज नाका हुन्डी तथा सुन कारोबारीको लागी सहज नाका हो । यसका लागी रक्सौलमा दर्जनबढी समुह हुन्डीमा सहभागि छन् भने नेपालतर्फ ढुवानी गर्ने भरियाका रुपमा त्यसका नेतृत्व गर्ने व्यक्ति र समुह पनि उक्तिकै सङ्ख्यामा रहेको स्रोत बताउँछन् ।