सबै कुरा

विश्व कीर्तिमान राख्न सफल पर्वतारोही पूर्णिमा श्रेष्ठको काठमाडौँमा स्वागत

सिधाकुरा

सोमबार, जेठ १४, २०८१

विश्व कीर्तिमान राख्न सफल पर्वतारोही पूर्णिमा श्रेष्ठको काठमाडौँमा स्वागत

काठकाडौँ । एकै सिजनमा तीन पटक विश्व सर्वोच्च शिखर सगरमाथा आरोहण गरी विश्व कीर्तिमान राख्न सफल पर्वतारोही पूर्णिमा श्रेष्ठलाई काठमाडौँमा भव्य स्वागत गरिएको छ । आजै लुक्लाबाट काठमाडौं आएकी श्रेष्ठलाई विमानस्थलमा स्वागत गरिएको हो ।

फोटो पत्रकार पूर्णिमा श्रेष्ठले एउटै याममा तीन पटक विश्वको सर्वोच्च शिखर सगरमाथाको आरोहण गरेर विश्व किर्तिमान कायम गरेकी छिन्। वसन्त ऋतुमा जारी सगरमाथा आरोहणमा उनले जेठ १२ गते बिहान सगरमाथाको चुचुरोमा तेस्रो पटक पाइला टेकेर उक्त कीर्तिमान बनाएकी हुन्।

यो आरोहणसँगै पत्रकार श्रेष्ठ एउटै याममा तीन पटक सगरमाथा आरोहण गर्ने पहिलो महिला बनेकी हुन्। उनले योसहित सगरमाथा आरोहण चौथो पटक हो । श्रेष्ठले यसअघि यही याममा मे १२ तारिखमा पहिलो पटक तथा मे १९ मा दोस्रो पटक सगरमाथाको सफल आरोहण गरेकी थिइन्।

गोरखाको आरुघाट गाउँपालिका–१० की श्रेष्ठले सन् २०१८ मा पहिलो पटक सगरमाथा आरोहण गरेकी थिइन् । उनले सगरमाथासहित विश्वका विभिन्न हिमाल आरोहण गरिसकेकी छिन् । विश्वका आठ हजार मिटरभन्दा माथिका १४ हिमाल आरोहण अभियानमा रहेकीय श्रेष्ठले गत वर्ष साउनमा पाकिस्तानस्थित विश्वकै दोस्रो अग्लो हिमाल के–टुको आरोहण गरेकी थिइन् ।