आइसिसी टी–ट्वान्टी पुरुष विश्वकप क्रिकेट प्रतियोगितामा नेपालले नेदरल्यान्डस् लाई १०७ रनको लक्ष्य दिएको छ । नेदरल्यान्डस्ले टस जितेर फिल्डिङ रोजेपछि नेपालले ब्याटिङ गरेको थियो । नेपालले १९.२ ओभरमा १०६ रन बनाएको हो । 

नेपालको लागि कप्तान रोहित पौडेलले सर्वाधिक ३५ रन बनाए ।  करण केसीले १७, गुल्सन झाले १४, अनिल शाहले, ११ कुशल मल्लले ९ र दीपेन्द्र १ रन जोडे ।

नेपाल र नेदरल्यान्डस दुवै चिरपरिचित प्रतिद्वन्द्वी हुन् । तीन महिना अघि नेपालमा भएको त्रिदेशीय टी–ट्वान्टी शृङ्खलामा नेदरल्यान्डस् दुई खेलमा विजयी हुँदा नेपालले एउटा मात्र खेल जितेको थियो । 

सन् २०१५ मा पहिलोपटक नेपाल र नेदरल्यान्डसले पहिलो पटक एकअर्काविरुछ खेलेका थिए । हालसम्म दुवैबीच ११ वटा खेल सम्पन्न भएका छन् । नेदरल्यान्डस ६ खेलमा विजयी भएको थियो भने नेपालले पाँच खेलमा जित हासिल गरेको थियो । 

टी–२० विश्वकप क्रिकेटमा नेपालको यो दोस्रो सहभागिता हो भने नेदरल्यान्डसको पाँचौ सहभागिता हो । नेपालले यसअघि सन् २०१४ मा पहिलो पटक टी–ट्वान्टी विश्वकप क्रिकेट खेलेको थियो । त्यतिबेला नेपालले हङ्कङ् र अफगानिस्तानलाई पराजित गरेको थियो । बङ्गलादेशसँग हार बेहोरेपछि नेपाल दोस्रो चरणमा पुग्न असफल भएको थियो । 

नेदरल्यान्डसविरुद्धको खेलमा कुशल भुर्तेल, आसिफ शेख, अनिलकुमार साह, कुशल मल्ल, रोहितकुमार पौडेल ९कप्तान०, दीपेन्द्रसिंह ऐरी, गुल्सन झा, सोमपाल कामी, करण केसी, अभिनास बोहरा र  सागर ढकालले खेलिरहेका छन् । 

नेपालले काठमाडौँमा गत वर्ष कात्तिकमा भएको एसिया छनोटमा संयुक्त अरब इरिरेट्स (यूएई)लाई सेमिफाइनलमा पराजित गर्दै दोस्रो पटक विश्वकपमा स्थान बनाएको हो । अमेरिका र वेस्टइन्डिजमा जारी टी–२० विश्वकपमा २० राष्ट्रको सहभागिता रहेको छ । विश्वकपमा नेपाल र नेदरल्यान्डस समूह ‘डी’ मा रहेका छन् । नेपालको समूहमा दक्षिण अफ्रिका, श्रीलङ्का र बङ्गलादेश समेत छन् ।