निरन्तर भईरहेको हवाइ दुर्घटनाबारे नियामक निकाय गम्भीर नभएको सांसदहरुकाे आराेप

काठमाडौँ । नेपालमा निरन्तर हवाइ दुर्घटना भइरहदा पनि नियमक निकाय गम्भीर हुन नसकेको भन्दै संसदीय समितिमा कुरा उठेको छ । बिहीबार सिंहदरबारमा बसेको प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समिति बैठकमा सो विषयमा छलफल भएको हो । 

Watch On

बैठकमा समिति सदस्यहरुले नेपालमा निरन्तर हवाइ दुर्घटना भइरहदा पनि नियमक निकाय गम्भीर हुन नसकेको आरोप लगाएका थिए । उनीहरुले दुर्घटनामा पाइलटलाई मात्रै दोषि देखाएर आफु पन्छिन खोजेको हो की भन्ने आशंका पैदा भएको समेत बताए । समिति सदस्य उदय शम्सेर जवराले जहाज दुर्घटनाको जिम्मेवारी सरकार र सरोकारवाला निकायले लिनुपर्ने बताए । बिमान दुर्घटनापछि आयोग बनाएर प्रतिवेदन निकाल्ने र पछि थन्काउने कामलाई बन्द गर्नुपर्ने उनको भनाइ छ । 

सांसदहरुको प्रश्नको जवाफ दिदै प्राधिकरणका महानिर्देशक अधिकारीले प्राधिकरणको जिम्मेवार निकायमा रहेका कारण दुर्घटनाको सवै जिम्मेवारी आफुले लिने बताए । उनले राज्यद्वारा गठित आयोग आधिकारिक भएकाले आयोगको रिपोर्ट स्वीकार्य हुने जिकिर गरे । 

जवाफ दिने क्रममा अधिकारीले सांसदसंग सवालजवाफ गरेपछि सभापति राजकिशोर यादवले आपत्ती जनाउदै संसदीय मर्यादा कायम गर्न निर्देशन दिएका थिए । अधिकारीले आफु संसदीय अभ्यासको विद्यार्थी नभएकाले समितिको नियमबारे जानकारी नभएको भन्दै क्षमा मागेका थिए । 

संस्कृति, पर्यटन तथा नागरिक उड्डयन मन्त्री बद्री प्रसाद पाण्डेले बिमान दुर्घटनापछि सरकारले बनाएको जाचँबुझ आयोगको प्रतिवेदनलाई शतप्रतिशत कार्यान्वयन गर्ने दावी गरेका छन् । 

मन्त्री पाण्डले यसअघि भएका बिमान दुर्घटनापछि बनेका आयोगको प्रतिवेदनमा बिषयमा निकै प्रश्न उठ्ने गरेको भन्दै अहिलेको आयोगले दिने प्रतिवेदन सुक्ष्म ढंगले अध्ययन गर्ने र शत प्रतिशत कार्यान्वयन गर्ने बताएका हुन् । बुधबार भएको सौर्य एयरको बिमान दुर्घटनाका बारेमा जानकारी दिदै मन्त्री पाण्डेले दुर्घटना भइसकेपछि बिमानस्थल पुगेर घटनाको अध्ययन गरिरहेको र सरोकारवाला निकायलाई पनि आवश्यक निर्देशन दिइएको बताए । उनले नेपालको हवाइक्षेत्र इयुको कालोसूचीबाट निकट भविष्यमा नै हट्ने विश्वास व्यक्त गरे । 

नागरिक उड्डयन प्राधिकरणका महानिर्देशक प्रदीप अधिकारीले सौर्य एयरलाइन्स दुर्घटनाको प्रावधिक बिषयमा छानविन आयोगलाई जानकारी गराउने बताए । अनुसन्धानमा प्रभाव पर्ने भएकाले अड्कलबाजी वा देखिएका कुराहरुमा राय दिन नमिल्ने उनको भनाई छ ।