बन्द भएको १० महिनापछि टिकटक खुलाउने तयारीमा सरकार

काठमाडाैँ । बन्द भएको टिकटक खुलाउने तयारी भएको छ । नेपाल सरकार मन्त्रीपरिषदले २०८० कात्तिक २७ गते निर्णय गरेर बन्द गरेको टिकटक सरकारले नै खुलाउने तयारी गरेको हो । 

Watch On

टिकटकका माध्यमबाट सामाजिक सद्भाव खल्बलिने गतिविधि भएको भन्दै तत्कालीन प्रचण्ड सरकारको क्याबिनेटले निर्णय गरेर बन्द गरेको टिकटक १० महिनापछि खुलाउने तयारी भएको हो । टिकटकले पटकपटक आफूहरु नेपालमा दर्ता भएर सञ्चालनमा आउन तयार रहेको र नेपालको कानुन मान्न तयार रहेको भन्दै परिपत्र गरेसँगै नेपाल सरकारले टिकटकमाथिको प्रतिबन्ध खुलाउने तयारी गरेको हो । 

पछिल्लो समय केही दिनअघि मात्र टिकटकले केही आफ्ना प्रतिबद्धतासहित नेपाल सरकार सुचना तथा सञ्चार मन्त्रालयलाई पत्र पठाएको थियो । टिकटकले आफू नेपाल सरकारको कानुन मान्ने र सम्पूर्ण प्रक्रिया पुरा गर्न तयार रहेको बताएपछि नेपाल सरकारले ३ महिनाभित्र सूचीकरण गरिसक्नुपर्ने गरि प्रतिबन्ध फुकाउने तयारी गरेको हो । त्यसका लागि आवश्यक अध्ययन गर्न सञ्चारमन्त्री पृथ्वी सुब्बा गुरुङ्ले कर्मचारीलाई निर्देशन दिइसकेको मन्त्रालयका एक कर्मचारीले बताए । 

‘प्रधानमन्त्री केपी शर्मा ओलीले समेत प्रतिबन्ध फुकाउन सहमति जनाउने छाँट देखाएपछि मन्त्रीले कर्मचारीहरुलाई अध्ययन र प्रक्रिया पुर्याएर टिप्पणी उठाउन निर्देशन दिनुभएको छ ’, उनले भने ।