सडकको कष्टदेखि आत्मीयताको छहारीसम्म

दमौली (तनहुँ) । सानै उमेरमा आफन्तको साथ छुटेपछि मानिसले कस्ता कठिनाइ भोग्नुपर्छ भन्ने उदाहरण हुन् दमौलीका गङ्गाराम परियार।

Watch On

बाल्यकालमा अभिभावकीय माया र संरक्षणबाट वञ्चित उनी करिब छ वर्षकै उमेरदेखि लागूऔषध दुर्व्यसनमा फसे। अभाव, एक्लोपन, असफल वैवाहिक सम्बन्ध र शारीरिक पीडाले उनको जीवनलाई झन् कठिन बनाउँदै लग्यो।

सानै उमेरमा उचित संरक्षण र मार्गदर्शन नपाएका गङ्गाराम गलत सङ्गतमा परे। बाल्यकालमै सुरु भएको दुर्व्यसनले उनको जीवनमा गहिरो प्रभाव पार्‍यो। केही समय पोखरास्थित एक संस्थामा बसेर खानपान, बसोबास र कामको व्यवस्था पाए पनि औपचारिक शिक्षा हासिल गर्ने अवसर भने पाएनन्। त्यहाँ रहँदा पनि दुर्व्यसनबाट मुक्त हुन नसकेपछि उनले संस्था छाडे।

जीवनलाई नयाँ ढङ्गले अघि बढाउने आशासहित उनले विवाह गरे। आफ्नै परिवार बनेपछि जीवन सहज होला भन्ने अपेक्षा थियो। तर वैवाहिक सम्बन्ध लामो समय टिक्न सकेन। श्रीमतीले साथ छाडेर अर्कै व्यक्तिसँग विवाह गरेपछि उनी फेरि एक्लो भए। जीवनका दुःखसुख बाँड्ने कोही नहुँदा उनी पुनः दुर्व्यसनतर्फ फर्किए।

जीविकोपार्जनका लागि उनी दैनिकजसो सामान लोड तथा अनलोड गर्ने काम गर्न थाले। श्रम गरेर कमाएको पैसाले साँझको आवश्यकता टार्थे। तर, दिनभरको मेहनतपछि पनि उनको जीवनको दिशा बदलिन सकेन।

दुर्घटनाले थलियो शरीर, सडक बन्यो आश्रय

गङ्गारामको जीवनमा अर्को ठूलो विपत्ति आइलाग्यो। मदिरा सेवन गरेको अवस्थामा लडेर उनका दुवै खुट्टा भाँचिए। त्यसपछि हिँड्डुल गर्न र काम गर्न नसक्ने अवस्थामा पुगे। नियमित आम्दानीको बाटो बन्द भयो। उपचार गरिदिने र हेरचाह गर्ने आफन्त वा सहारा नहुँदा उनी झन् असहाय बने।

शारीरिक पीडा र आर्थिक अभावबीच उनको जीवन सडकमा बित्न थाल्यो। न सहज रूपमा उपचार पाउने अवस्था थियो, न त आफ्नो दुःख सुनिदिने आफन्त। काम गरेर जीवन धान्दै आएका उनी अब अरूको सहयोगबिना सामान्य जीवन बिताउन नसक्ने अवस्थामा पुगे।

यही अवस्थाबारे जानकारी पाएपछि गत असोज २० गते जिल्ला प्रहरी कार्यालय लमजुङ र मानवसेवा आश्रम लमजुङले संयुक्त रूपमा उनको उद्धार गरे। सडकमा कष्टकर जीवन बिताइरहेका गङ्गारामलाई उद्धार गरी मानवसेवा आश्रममा ल्याइएको मानवसेवा आश्रम लमजुङकी सेल्टर संयोजक सङ्गीता विकले जानकारी दिइन्।

आश्रममा ल्याइएपछि गङ्गारामको स्वास्थ्य उपचार र हेरचाह सुरु गरियो। लामो समयदेखि उपचारको अभावमा पीडा सहँदै आएका उनका दुवै खुट्टाको उपचार गरियो। सुरक्षित बसोबास र नियमित हेरचाहको व्यवस्था मिलाइएको विकले राससलाई जानकारी दिइन्।

जीवनको लामो समय अभाव, उपेक्षा र एक्लोपनमा बिताएका गङ्गारामका लागि आश्रमको वातावरण नयाँ थियो। त्यहाँ उनका लागि बस्ने ठाउँ र खानपानको व्यवस्था गरिएको छ। साथै, उनले आत्मीयता र पारिवारिक वातावरणको अनुभूति गर्न पाएका छन्। हाल गङ्गाराम मानवसेवा आश्रम लमजुङमा आश्रित छन्।