काठमाडौँ । प्रतिनिधिसभा अन्तर्गतको अर्थ समितिले बैंकिङ कसुर तथा सजाय (दोस्रो संशोधन) विधेयक, २०८० माथि संशोधनकर्तासँग छलफल गरेको छ । 

सिंहदरबारमा आइतबार बसेको बैठकमा संशोधनकर्ता सांसदहरुले आफ्नो संशोधनको औचित्यमाथि धारणा राखेका हुन् । सो क्रममा संशोधनकर्ता सांसद सोविता गौतमले चेक अनादर सम्बन्धी चाप बित्तिय संस्था र अदालतमा समेत रहेकाले सान्र्दभीक रुपमा विधेयक आएको बताइन् । उनले विधेयकमा जानीजानी बैंकमा रकम नभएको चेक दिने बिषयले जानीजानी वा अन्जानबस भन्ने बिषय पुष्टि गर्न कठिन हुने भएकाले जानीजानी शव्दको ठाँउका अर्को शव्द राख्न सुझाव दिइन् । 

त्यस्तै सांसद बिमला सुवेदीले बैंकमा रकम नभएको चेक दिने बिषयको कानूनी निरुपणका क्रममा विगो बमोजिमको रकमको कानुन बमोजिमको व्याज भन्ने शव्द राख्न संशोधन प्रस्ताव राखिएको बताइन् ।

समिति सभापति सन्तोष चालिसेले २० जना संशोधनकर्तामध्ये अव ६ जनाले मात्रै धारण राख्न बाँकी रहेको जानकारी दिए । सबैले धारणा राखेपछि दफावार छलफल गरी विधेयकलाई छिटो पारित गर्ने उनले बताए । 

२०८० साउन २३ गतेको मन्त्रिपरिषद् बैठकले बैंकिङ कसुर तथा सजाय ऐन, २०६४ लाई संशोधन गर्न बनेको विधेयक, २०८० को मस्यौदा स्वीकृत गरेको थियो भने तत्कालीन अर्थमन्त्री अर्थमन्त्री डा प्रकाशशरण महतले २०८० असोज १६ गते यो विधेयक सदनमा दर्ता गरेका थिए । चेक अनादरसम्बन्धी मुद्दामा फरक–फरक खालको कानुनी उपचारको अवस्था देखिएकाले यसलाई एकरुप बनाउनका लागि सरकारले विधेयक ल्याएको हो ।