भ्रष्टाचारका फाइलको अनुसन्धान गर्ने सरकारकाे छनक देखिएन : रवि लामिछाने

धनगढी । राष्ट्रिय स्वतन्त्र पार्टीका सभापति रवि लामिछानेले आफूहरु सरकारमा रहँदा अनुसन्धान गरेका विभिन्न भ्रष्टाचारका फाइलहरु कहाँ पुगे आफूलाई थाहा नभएको बताएका छन् । सोमबार रास्वपा सुदूरपश्चिम प्रदेशको विस्तारित बैठकका लागि धनगढी पुगेका लामिछानेले विमानस्थलमा सञ्चारकमीहरुसँग कुराकानी गर्दै आफूहरुले अनुसन्धान गरेका फाइलहरु कहाँ पुगे, अहिले त्यसबारे केही प्रगति नदेखिएको बताएका हुन् । 

Watch On

अहिलेको सरकारले भ्रष्टाचारका फाइलमा अनुसन्धान गर्ने कुने छनक नदेखिएपनि एक सय दिनसम्म आशा गर्नुपर्ने बताएका छन् । ‘भ्रष्टाचारका फाइलहरुको अनुसन्धानमा सरकारले त्यस्तो छनक त देखिएको छैन, यद्यपी कुर्न अझै सकिन्छ । सय दिन चाहीँ पुग्न दिउँ भन्ने लागेको छ ।’, लामिछानेले भने, ‘अनुसन्धान गरिरहेको अधिकृतहरुलाई अन्यत्र सरुवा गरियो भन्ने सुन्नमा आएको छ । त्यो कुनै निरन्तर प्रक्रियाबाट हो कि अन्य कारण हो, त्यो खुल्दै जाला । यो बीचमा हामीले अनुसन्धान गर्दै गरेको फाइलहरुलाई निश्कर्षमा पुर्याउने कुनै जोडबल भएका समाचारहरु आएका छैनन्, त्यही भएर ती फाइलहरु कहाँ गए, के भए मलाई थाहा छैन ।’

त्यस्तै सभापति रवि लामिछानेले सहकारी ठगी प्रकरणमा छानबिन समितिले निचोड निकाल्ने अपेक्षा लिएको बताए । विभिन्न पदाधिकारीहरुसँग बयान लिइरहेको समितिमा आफूले समेत बयान दिएका कारण सत्य तथ्य बाहिर आउने र पीडितहरुले न्याय पाउनेमा उनले विश्वास व्यक्त गरे ।