सहकारी ठगीमा कांग्रेसकै सांसद धनराज गुरुङविरुद्ध कांग्रेसले रोष्ट्रम घेराउ गर्छ गर्दैन ? : गणेश पराजुली

काठमाडाैँ । राष्ट्रिय स्वतन्त्र पार्टीका सांसद गणेश पराजुलीले सहकारीको रकम हिनामिना प्रकरणमा कांग्रेस उपसभापति धनराज गुरुङविरुद्ध कांग्रेसले रोष्ट्रम घेराउ गर्छ गर्दैन ? भन्दै प्रश्न गरेका छन् । उनले सोमबारको प्रतिनिधिसभा बैठकमा बोल्दै मितेरी बचत तथा ऋण सहकारी संस्थाको करिब १५ करोड रुपैँया धनराज गुरुङले हिनामिना गरेको भन्दै उनीविरुद्ध कांग्रेसले कस्तो नीति अपनाउँछ भन्दै प्रश्न गरेका छन् । 

उनले भने, 'सहकारी बचत अपचलन छानबिनका लागि संसदीय छानबिन समिति बनाउनुपर्छ भन्दै यही संसदमा चर्को नाराबाजी गर्ने मध्येका एक माननीयज्यू विरुद्ध एक सहकारीमा ठगी गरेको भन्दै अनुसन्धान गर्नका लागि प्रहरीको केन्द्रीय अनुसन्धान ब्यूरोमा उजुरी परेको समाचारहरु आइरहेका छन् । उजुरी नै अन्तिम सत्य त होइन्, तर उजुरी नपर्दा र यथेष्ट प्रमाण नहुँदापनि राष्टि«य स्वतन्त्र पार्टीका सभापति रवि लामिछानेविरुद्ध यस सम्मानित सदनमा के के समेत गरियो, सारा संसारले देखेको छ । हामीले भोगेर आएका छौँ । तर मितेरी बचत तथा ऋण सहकारी संस्थाका अध्यक्ष कुम्भराज गुरुङले आफ्नो सहकारीको करिब १५ करोड रकम हिनामिना गरेकोमा माननीय धनराज गुरु र ज्योती गुरुङविरुद्ध ठगी गरेको आरोपसहित मुद्दा दर्ता गरेका छन् । अब म माननीय धनराज गुरुङविरुद्ध छानबिन हुन्छ कि हुँदैन भनेर यस सम्मानित सदनमार्फत नेपाली कांग्रेसका माननीयहरुलाई सोध्न चाहान्छु, सहकारीको ठगी लुकाउन उहाँले नक्कली सम्बन्ध विच्छेद गरेको समेत समाचारहरु आएका छन्, सहकारी ठगीको छानबिनका लागि माग गर्दै अब नेपाली कांग्रेसका माननीयहरुले रोष्टम र रो घेराउ गर्नुहुन्छ कि हुँदैन । कि दोहोरो मापदण्ड अपनाउने हो ?'