रविको प्रश्नः ‘म गृहमन्त्री रहँदा सरकारले नागरिकको ज्यान लियो भन्नेहरु अहिले किन चुपचाप ?’

काठमाडाैँ । राष्ट्रिय स्वतन्त्र पार्टीका सभापति रवि लामिछानेले विपदको समयमा सरकार निरिह देखिएको बताएका छन् । प्रतिनिधिसभा अन्तर्गतको राज्य व्यवस्था समितिको आजको बैठकमा बोल्दै समितिका सदस्य समेत रहेका लामिछानेले सरकारले विपदको समयमा नागरिकको उद्दार र व्यवस्थापनमा असफल भएको बताएका हुन् । 

Watch On

बैठकमा बोल्दै लामिछानेले संसदका २ ठूला दल सरकार साझेदारीमा रहेको तर नागरिकको जीवन रक्षामा असफल भएको बताएका छन् । आफू गृहमन्त्री रहँदा सरकारले नागरिकको ज्यान लियो भन्ने सांसदहरु सत्तामा भएपछि चुपचाप बसेको उनले बताए । ‘यहीँ हुनुहुन्छ माननीयज्यूहरु, त्यसबेला राजु सदाको मृत्यु हुँदा त्यो मृत्यु हैन, राज्यले हत्या गरेको हो भन्नुहुन्थ्यो । त्यो ढंगको प्रतिक्रिया हुनुपर्यो नि । त्यो किसिमको अर्जेन्सीको महसुस हुनुपर्यो नि । त्यसको महसुस भएर त्यहि किसिमको अभिव्यक्त हुनुपर्यो नि विपदमा । भोलीका दिनमा यस्तो नहोस भनेर ।’, लामिछानेले भने, ‘घातक छ, २ तिहाईको सरकार घातक छ । एउटा प्रतिपक्षमा बस्नुपर्छ ठूलो पार्टी । नत्र यस्तै हुन्छ, शान्त हुन्छ, केहीपनि नभएजस्ता हुन्छ । महत्वपूर्ण कुरामा चुपचाप भइन्छ । यो घातक हो ।’

त्यस्तै रास्वपा सभापति लामिछानेले सरकारले विपदको पूर्वतयारी राम्रोसँग गर्न नसकेको र विपद्पछि राजमार्गमा अलपत्र नागरिकको सहज ढंगले उद्दार गर्न नसकेको समेत आरोप लगाएका छन् ।