रवि लामिछानेलाई जहाजबाट पर्सा लैजाने तयारी, पोखराबाट काठमाडौँ ल्याइँदै

काठमाडाैँ । सहकारी प्रकरणमा पक्राउ परेका राष्ट्रिय स्वतन्त्र पार्टीका सभापति रवि लामिछानेलाई बयानका लागि पर्सा लगिने तयारी गरिएको छ । कास्की प्रहरी हिरासतमा रहेका उनलाई पोखराबाट काठमाडौँ ल्याएर जहाजमार्फत नै पर्सा पुर्याउन लागिएको हो । लामिछानेलाई साढे २ बजे सिमरा पठाइने तयारी भएको छ । 

Watch On

पर्साको सानोपाइला सहकारी संस्थाको रकम हिनामिना प्रकरणमा लामिछानेमाथि पक्राउ पूर्जी जारी भएपछि उनलाई बयानका लागि पर्सा लग्न लागिएको हो । उनलाई प्रहरीले पोखरा अन्तर्राष्ट्रिय विमानस्थलमा पुर्याएको छ । 

सहकारी रकम अपचलनको आरोप लागेका लामिछानेलाई कास्की प्रहरीको पत्रका आधारमा कात्तिक २ गते नेपाल प्रहरीको केन्द्रीय अनुसन्धान ब्यूरोले पक्राउ गरेर कास्की पठाएको थियो । 

कास्की जिल्ला अदालतले गत आइतबार रवि लामिछानेलाई हिरासतमा राखेर अनुसन्धान गर्न छैटौँ पटक म्याद थप गरेको थियो । अदालतले रविलाई ४ दिन हिरासतमा राखेर अनुसन्धान गर्न अनुमति दिएको छ। 

लामिछानेमाथि  पोखराको सूर्यदर्शन, बुटवलको सुप्रिम, चितवनको साहारा, काठमाडौँको स्वर्णलक्ष्मी, पर्साको सानोपाइला सहकारीको रकम अपचलनमा अनुसन्धान भइरहेको छ । प्रहरीले पर्सा बाहेकका सहकारी भएको ठाउँमा लगेर लामिछानेको बयान लिइसकेको छ भने आज पर्सा पुर्याएर बयान गराउने तयारी गराएको छ।