काठमाडौँ । दिउँसै बत्ती बालेर छिर्नुपर्ने सानो अँध्यारो कोठा । एकछेउमा टिनको दराज, त्यसैको छेउमा खुट्टे खाट । खाटमा अचेत ढलिरहेकी छिन्, ६५ वर्षीया बिन्दु कुमारी तितुङ ।

अस्वस्थ आमाको खुट्टातर्फ बसेर आमाकै सिरक थम्थम्याइरहेकी छिन्, २६ वर्षीया कोपिला, जो आफैँमा अशक्त छिन् । 

किर्तिपुरको प्रहरीको बिट नजिकैबाट अघि बढेपछि रङ्ग नलगाएको एक पुरानो घर पुगिन्छ । सोही घरसँगै टाँसिएको अर्को एक टहरोमा जिन्दगीको दुःखका रातहरू बिताइरहेका छन् बिन्दु र कोपिलाका आमाछोरी ।

जीवनको उत्तरार्धमा आधा दर्जन रोगले थलिएकी आमा र शारीरिक रुपमा आफैँ पनि अशक्त कोपिलाको जीवन सुन्दर भविष्यको सपनाहरू पछ्याउँदा पछ्याउँदै बज्रपातले बजारिएका छन् । घरको मुख्य भरोसा रहेका श्रीमान् बिते, सुखको खोजीमा परदेशिएका छोराको प्राण पखेरो उतै खोसियो । छोरी दुर्घटनामा परेर अशक्त भइन् । राेगले ग्रस्त बिन्दु सहाराविहिन भइन । 

०००

तितुङको परिवारको स्थायी घर बारा जिल्ला हो । तर, उनीहरु काठमाडौँ आएर बसेको ३० वर्ष बढी भयो । किर्तिपुरमा बसोबास गर्दै बिन्दु र उनका श्रीमान ज्याला मजदुरी गर्थे । त्यसैको कमाईबाट छोरा गणेश र छोरी कोपिला हुर्काए ।

बिहान खाए बेलुका के खाउँ भन्ने अवस्थाबाट गुज्रिएको बिन्दुको परिवारमा एक दशकअघि पहिलो ठूलो बज्रपात पर्यो । 

प्रेसर र सुगरबाट ग्रसित उनका श्रीमानको समयमा उपचार गर्न नसक्दा ज्यान गयो । घरको सबै व्यवहार चलाउने श्रीमानको मृत्युपछि बिन्दुले छोरा–छोरीलाई हुर्काउन आफैँ कम्मर कसिन् । छोराछोरी हुर्काउन बिन्दु कहिले बिहानै बल्खु पुगेर मकै ल्याएर पोल्थिन् भने कहिले बदाम बेचेर परिवार चलाउन थालिन् ।

बुढ्यौली उमेरमा चिसो र धुलोमा काम गर्दै आएकी बिन्दुलाई ग्यास्टिक, पाठेघर र मुटुको रोगले च्याप्न थाल्यो । अशक्त बहिनी र आमाको स्वास्थ्य अवस्थाका कारण गणेश घर धान्न परदेसिने निर्णयमा पुगे ।  

९ वर्षअघि मलेसिया उडेका गणेशको कमाईले केही समय परिवार राम्रै चल्दै थियो । काम राम्रो भएको भन्दै उनले भिसा समेत थपेका थिए । मलेसिया बसाईको ५ वर्ष पुगेपछि २०७७ सालको एक दिन गणेशले घरमा फोन गरेर आमा र बहिनीलाई आफू मारिन लागेको खबर सुनाए । 

त्यस पहिले सबै ठिकठाक बताउने गणेशले एक्कासी आफूलाई साथीहरुले मार्न लागेको खबर सुनाए र सम्पर्कविहिन बने । त्यसको एक हप्तासम्म सम्पर्कबिहिन रहेका उनको एक्कासी मृत्युको खबर परिवारमा आइपुग्यो । श्रीमान् गुमाए पछि जसोतसो छोराले धान्दै गरेको घर पुनः उजाडियो ।   

गणेशको काजकिरिया गर्न सरकारले २ लाख क्षतिपूर्तिबापतको पैसा दियो । बहिनी कोपिलाले दाजुको पैसा नचलाउने भनेर नजिकै शाखा रहेको शिवशिखर बहुद्देश्यीय सहकारीमा जम्मा गरिदिइन् । सो सहकारीले मासिक २ हजार ब्याज दिन्थ्यो । 

घरमा नुनपानी खानलाई जसोतसो ब्याजले पुग्थ्यो, आमा जसोतसो घिस्रिएरै भएपनि त्रिवि परिसरमा बदाम बेच्थिन् । दुखका साथ बिन्दु र कोपिलाको गुजारा चल्दै थियो, सहकारीमा समस्या सुरु भयो । 

ब्याजको आशले सहकारीमा पैसा राखेका आमाछोरीको मुल धन नै लिएर सहकारी फरार भयो । 

जीवन धान्नै कठिन भएपछि बैसाखी टेकेर १२ कक्षासम्म अध्ययन गरेकी कोपिला नजिकैको एक नीजि कम्पनीमा काम गर्थिन् । कोपिलाको जागिर र आमाले बेच्ने बदामको कमाईबाट जसोतसो चलिरहेको थियो । तर, अहिले कोपिलाले काम गर्ने कम्पनी कीर्तिपुरबाट सरेर अन्तै गयो । एक खुट्टाको भरमा उनी कम्पनीको पछिपछि जान सकिनन् । 

अब घरको सबै दायित्वको आमा बिन्दुकै काँधमा आयो । एक दिन बदाम बेच्ने क्रममा चिप्लिएर बिन्दु लडिन् । आफन्तको सहयोगका भरमा जसोतसो उनको उपचार त भयो, तर उनी उठेर हिँड्न नसक्ने अवस्थामा पुगिन् । 

अहिले उनको कम्मरभन्दा तल देब्रो खुट्टा चल्दैन । एक खुट्टाको बलमा जसोतसो शौचालय जान्छिन्, खाटबाट तल झर्न अशक्त छोरीको भर चाहिन्छ पुरानो रोग त छँदै छ ।

एक पछि अर्को समयको बज्र टाउकोमा बजारिएपछि यतिबेला बिन्दु र कोपिला साहाराबिहिन बनेका छन् । श्रीमान् र छोराको बियोगले बिन्दुलाई बिझाइरहन्छ । 

उनीहरुलाई अहिले खाए भरे के खाने, भरे खाए भोली के खाउँ भन्ने चिन्ताले सताएको छ । सरकारले दिने आमाछोरीको भत्ताबाहेक अन्य सबै आम्दानीको स्रोत बन्द भएपछि उनीहरुले मनकारीबाट सहयोगको याचना गरीरहेका छन् ।  

छोरी कोपिला अशक्त भएपनि उनीसँग कम्प्युटर र डिजिटल मार्केटिङको ज्ञान र अनुभव छ । तर, उनी बिरामी आमा छोडेर कामका लागि टाढा जान पाउँदिनन् । 

आमाको उपचार र आफूलाई घरमा बसेर काम गर्ने अवसर मिलाइदिए आफ्नी आमा अझै केही वर्ष बाँच्ने र आफूलाई पनि सहयोग हुने उनी बताउँछिन् । 

भनिन्छ नी बरु ऋण लागोस् तर दिन नलागोस् । तर, बिन्दु र कोपिला आमाछोरीको जीवनमा जे नहोस् भनेको त्यही मात्रै भइरहेका छन् । आफ्नो दुःखले कठ्याङ्ग्रिएका उनीहरुले मनकारीबाट सहयोगको अपेक्षा राखेका छन् । 

बिन्दु र कोपिला आमाछोरीलाई सम्पर्क र सहयोग गर्न :

कोपिला लामा :

सम्पर्क नम्बर : ९८४९५७०९३०

बैँक खाता विवरण :

नाम : कोपिला लामा 

कुमारी बैँक, किर्तिपुर ब्रान्च

खाता नम्बर : १०८०२१७५२१७००००१

- फाेटाे/भिडियाे : दिपेन्द्र थापा मगर