धरानमा निर्धारित कार्यक्रम स्थगित गर्न राजनीतिक दलहरुको आह्वान

भदौ ८, सुनसरी- धरानमा बसेको सर्वदलीय बैठकले शनिबारका लागि हिन्दु समर्थकले आह्वान गरेको निर्धारित कार्यक्रमहरु स्थगित गर्न साथै सम्बन्धित सरोकारवाला निकायलाई सामाजिक सद्भाव तथा शान्ति सुरक्षा कायम गर्न आवश्यक व्यवस्था मिलाउन अनुरोध गरेकाे छ ।

Watch On

शुक्रबार बसेको १३ दलको बैठकले एक साझा विज्ञप्ती जारी गर्दै सामाजिक सद्भाव खल्बलिने कुनै पनि कार्यक्रम नगराउन साथै सामाजिक सञ्जालबाट पनि सामाजिक सद्भावमा समस्या उत्पन्न हुने कुनै सामाग्री शेयर नगर्न नगराउन अनुरोध गरेका छन् । 

विज्ञप्तीमा भनिएको छ, ‘सबै जाति, धर्म, समुदायले एक आपसको धर्म, संस्कार, संस्कृति र परम्परालाई सम्मान गर्दै सामाजिक द्वैष तथा आस्थामा ठेस पुर्याउने गतिविधि नगरिदिनुहुन अनुरोध गर्दछौं’ ।

त्यस्तै पछिल्लो समय धरानमा असहज परिस्थिति उत्पन्न भइरहँदा यहाँको सहिष्णुता र सद्भाव विथोलिन सक्नेप्रति सर्वदलिय बैठकले चिन्ता समेत व्यक्त गरेका छन् । 

स्थानीय स्तरमा देखिएका धार्मिक, सांस्कृतिक विवादका विषयहरुलाई सर्वपक्षीय साथै सर्वदलीय वार्ता तथा संवादबाट समाधान गर्न आफूहरु प्रतिवद्ध रहेको उनीहरुले बताएका छन् ।

पछिल्लाे समय धरानमा गोरु काटेर खाएको साथै मन्दिर अगाडि चर्च बनाएको भन्दै केही हिन्दु समर्थकले शनिबार प्रदर्शनको आह्वान गरेका छन् । 

प्रदर्शनकाे आह्वान पछि धरानको स्थानीय प्रशासनले आज राति १२ बजेदेखि भोलि राति १२ बजेसम्म धरान प्रवेशमा समेत रोक लगाएको छ ।