उदयपुरमा सवारी दुर्घटना, ११ जना घाईते

उदयपुर । मदन भण्डारी लोकमार्ग अन्तर्गत उदयपुर सडक खण्डमा चार पाङग्रे यात्रुवहाक इभि गाडी दुर्घटना हुँदा ११ जना घाइते भएका छन् । 

Watch On

लोकमार्गको कटारी–गाईघाट सडक खण्ड अन्तर्गत उदयपुरगढी गाउँपालिका–७ अधेँरीमा दुर्घटना भएको हो।

काठमाडौ बाट गाईघाट तर्फ आउँदै गरेको प्र १–०५–००१ ज ००५८ नम्वरको इभि गाडी ओरालो बाटोमा बेक्र फेल भई अनियन्त्रित भई  दुर्घटनामा परेको जिल्ला प्रहरी कार्यालय उदयपुरले जनाएको छ।

प्रहरीका अनुसार घाइते हुनेहरुमा त्रियुगा नगरपालिका–९ राजावासका २६ वर्षिय  गोपी दनुवार, त्रियुगा–८ साईखोलाका २० वर्षिय निशन खड्का र जिल्ला भक्तपुर सूर्यविनायक नगरपालिका–४ बस्ने ६० वर्षिय सानुमाया श्रेष्ठलाई विराट टिचिङ अस्पताल विराटनगर रेफर गरिएको छ।

दुर्घटनामा रौतामाई गाँउपालिका–७ का ४५ वर्षिय पुष्पा खड्का गम्भिर घाइते भएपछि  उनको जिल्ला अस्पताल उदयपुरमा सामान्य उपचार गरी न्यूरो अस्पताल विराटनगर पठाइएको प्रहरीले जनाएको  छ ।

यसैगरी घाइतेहुनेमा सवारी चालक त्रियुगा नगरपालिका–६ का २० वर्षिय  हिमाल बस्नेत, २४ वर्षिय संगिता खत्री, चौदण्डीगढी नगरपालिका–१० बस्ने १८ वर्षिय मिजा सेवा, भक्तपुर सूर्यविनायक नगरपालिका–४ बस्ने ६६ वर्षिय श्याम काजी श्रेष्ठ, ३३ वर्षिय प्रतिक्षा बजिमय, सिन्धुली कमलामाई नगरपालिका–१० बस्ने  ४३ वर्षिय ओम बहादुर भुजेल, खोटाङ बराहापोखरी गाँउपालिका–४ बस्ने  १९ वर्षिय अनिश राई रहेको र उनिहरुको जिल्ला अस्पताल गाईघाटमा सामान्य उपचार पश्चात डिस्चार्ज गरिएको जिल्ला प्रहरी कार्यालय उदयपुरका सूचना अधिकारी तथा डिएसपी केदारमान दोङले बताए । दुर्घटनाको कारण ब्रेक फेल भएको प्रारम्भिक अनुमान गरिएको छ भने घटनाबारे थप अनुसन्धान भइरहेको प्रहरीले जनाएको छ।