सर्लाही । शनिबार बिहानको करिब साढे ११ बजेको थियो । सर्लाहीको ईश्वरपुर नगरपालिका–१२ घारिबथानस्थित गोपी चोकका उपेश परियार तार जोड्न धुलीखेलको खम्बामा चढेका थिए । 

उनी चढेको खम्बामा टाँघिएको तारमा सानोतिनो होइन ११ हजार भोल्टको करेन्ट बग्ने गर्दथ्यो । उनी पोलमा चढेर काम गरिरहेकै समयमा उक्त तारमा एक्कासी करेन्ट बग्न थाल्यो । उपेशले ऐया पनि भन्न पाएनन् । उनको प्राण पखेरो छिनभरमै उँड्यो । 

यता उपेशको प्राण उँड्यो उता परिवारको साहारा सकियो । आँखा देख्न नसक्ने बृद्ध आमा, बाबु, ८ वर्षकी छोरी, ५ वर्षका छोरा र श्रीमतिको एकमात्र साहारा थिए उपेश । त्यसैमाथि दैव पनि यही परिवारमाथि नै खनिएको छ । जेठ १ गते आएको हुरीले उनकै घरको मात्र छानो उडायो । यता छानो उँडेको २ दिनपछि उता परिवारको एकमात्र खम्बा ढल्यो । हुण्डरीले घारिबथानमा उज्वल घर वाहेक कसैको घरमा क्षति भएको छैन । 

घरमा दृष्टिविहीन आमा विष्णु दमाई छोराको मृत्युको खबरले विक्षिप्त छिन् । उनलाई अहिले यो अवस्थामा आफू साहाराबिहिन बनेको चिन्ता त छ नै त्यो भन्दा बढी चिन्ता बेसाहारा बनेका नातिनातिनाको छ । 

उपेशको मृत्यु भएको खबर सुनेपछि धुरी नभएको घरमा आफन्त र गाउँलेहरु भरिएका छन् । आफन्तहरुले धुलिखेलबाट शव सर्लाही लैजादै छन् । शव लिएर आएपछि काजकिरियामा बस्ने ठाउँ समेत नरहेकाले गाउँले मिलेर उज्वलको घरमा छानो हालिदिएका छन् । “यही थोरै घडेरी र यो घर बाहेक यिनिहरुको केही पनि छैन्, त्यही उज्वलले कमाएर परिवारको गुजारा चलाइरहेको थियो,” छिमेकी फणिन्द्र पौडेलले उपेशको परिवारको हालत सुनाए । 

उज्वलको घरमा हावाहुरीले छानो उडाएपछि खाने अन्न र लगाउने कपडा सबै भिजेको छ । घरमा जम्मा भएका गाउँलेहरु यस्तो पीडा कसैलाई नपरोस् कामना गरिरहेका छन् । 

परिवारका अनुसार उज्वल केही समयदेखि धुलिखेल क्षेत्रमा  विस्तार भइरहेको हाइटेन्सन लाइनमा ठेकेदारमार्फत मजदुरको रुपमा काम गरिरहेका थिए । शनिबार धुलिखेल नगरपालिका–७, स्थित जिल्ला प्रशासन कार्यालय काभ्रे अगाडि हाइटेन्सन लाइनको खम्बामा चढेर काम गरिरहेका बेला एक्कासी लाइन छाड्दा उज्वलको घटनास्थलमै मृत्युु भएको थियो । घटनापछि मृतकको परिवारलाई १० लाख रुपैयाँ दिने र परिवारलाई रोजगारीको व्यवस्था गर्ने सहमति भएको छ । 

पोलमा चढेका मजदुरलाई ११ हजार भोल्टको करेन्टले झट्का दिएको विषयलाई सामान्य रुपमा लिन नहुने चौतर्फी आवाज उठिरहेको छ । आइतबारको संसदमा यो हदको लापरवाही रोकिनुपर्ने र दोषीलाई हत्या अभियोगमा कारबाही हुनुपर्ने माग उठेको छ ।