७ करोड खर्चेर नयाँ स्वरुपमा सञ्चालनमा आयो ‘होटल मार्कोपोलो’

काठमाडौँ । काठमाडौँको कमलपोखरीमा मार्कोपोलो होटल औपचारिक रुपमा सञ्चालनमा आएको छ । ईन्द्रेणी मल्टीप्रपोज ईन्भेस्टमेन्ट प्रालिले होटल मार्कोपोलो एण्ड रुफटप रेष्टुरेन्ट संचालनमा ल्याएको २४ दिनपछि औपचारिक रुपमा उद्घाटन भएको हो । नेपाल उद्योग बाणिज्य महासंघका अध्यक्ष चन्द्र प्रसाद ढकालले शनिबार एक समारोहकाबिच होटलको उद्घाटन गरेका छन् ।

Watch On

होटलको उद्घाटन गर्दै अध्यक्ष चन्द्र ढकालले नेपालमा सम्भावना हुँदाहुँदै पनि कतिपय चिजहरुलाई गुमाइरहेको बताए । उनले नेपालमा साच्चिकै सम्भावना रहेकाले आफ्नै देशमा होटल रेष्टुरेन्ट संचालनमा ल्याउनु सकारात्मक पक्ष भएको बताएका छन् ।

उनले भने, ‘अहिले नेपालमा एकदमै सम्भावना हुँदाहुँदै पनि कतिपय चिजहरुलाई गुमाइरहेका हुन्छौं । कतिपय सम्भावनाहरु अगाडि बढाउनका लागि नकारात्मक वातावरण छैन भन्ने हिसावलाई चिर्नका लागि देशमै केही न केही गर्नुपर्ने भन्ने यो एउटा सकारात्मक उदाहरण हो । नेपालमा साच्चिकै सम्भावना छ भन्ने जुन म्यासेज दिनको लागि र नेपालमा रहनु हुने सबैलाई सम्भावना छ भन्ने उदेश्यले होटल अगाडि बढाउनु भयो यो साच्चिकै राम्रो पक्ष हो ।’

साथै उनले हरेक नेपाललाई प्रमोट गर्ने एउटा सम्भावित एरियामा लगानी गर्नु सबल पक्ष भएको बताए । उनले मार्कोपोलो प्रालिले आफैंमा नेपालको पर्यटक क्षेत्रलाई अगाडि बढाउनमा विशेष भूमिका खेलेको बताए ।

इन्द्रेणी मल्टिपर्पोज प्रालिको ७ करोड लगानीमा होटलको स्तरोनन्तिको काम सम्पन्न भएसँगै औपचारिक रुपमा सञ्चालन आएको हो।

नयाँ व्यवस्थापनले होटलको भौतिक संरचना, सेवा सुविधा र खानपानमा व्यापक सुधार गर्दै आधुनिक प्रविधियुक्त होटलको अवधारणा अघि सारेको छ । होटलका निर्देशक कृष्ण सुवेदीले पाहुनालाई नयाँ अनुभव हुनेगरी होटल रूम, रेष्टुरेन्ट र बैठक कक्ष तयार भएको जानकारी दिए ।

स्वच्छ, शान्त र पारिवारिक वातावरणमा बस्न चाहने ग्राहकका लागि उपयुक्त हुने गरी होटललाई ४ प्रकारका ३० वटा अत्याधुनिक तथा सुविधायुक्त कोठाहरूसहित डिजाइन गरिएको छ । होटलमा ४ हजारदेखि ८ हजारसम्मका डिलक्स तथा स्विटरूमहरूमा मध्ययवर्गीय नेपाली तथा विदेशी पर्यटकले उत्कृष्ट अनुभव गर्नेछन् ।

काठमाडौं शहरको सुन्दर दृश्यावलोकनसहित स्वादिष्ट खानाका परिकार पाईने रुफटप रेष्टुरेन्ट मार्कोपोलो होटलको विशेष आकर्षण हुनेछ । होटलमा ६० जना क्षमताको सभाहल समेत बनेको छ । बैठक तथा सेमीनारका लागि उपयुक्त डिजाईनमा बनेको हलमा ग्राहकले ५० देखि ६० जनासम्म सहभागी हुने उत्सवका लागि समेत प्रयोग गर्न सक्नेछन् ।

आकर्षक ग्रिनरी डिजाईनमा तयार पारिएको रूफटप रेष्टुरेन्टमा नेपाली परिकारसँगै इण्डियन, जापनिज र कन्टिनेन्टल परिकारहरु उपलब्ध हुनेछन् । ग्राहकको रूचिका आधारमा विदेशी तथा स्वदेशी पाहुनालाई ध्यानमा राखेर मेनु तयार गरिएको निर्देशक सुवेदीको भनाई छ ।

ईन्द्रेणी मल्ट्रीप्रपोज प्रालिले पहिलो चरणमा काठमाडौंबाट सेवा थालेपनि यसलाई विस्तार गर्दै देशका अन्य शहरमा पनि लैजाने तयारी छ ।