३१९ किलो चरेशसहित एकजना पक्राउ

पर्सा । जिल्ला प्रहरी कार्यालय पर्साले ठूलो मात्रामा लागुऔषध चरेशसहित एक जना ट्रक चालकलाई नियन्त्रणमा लिएको छ । 

Watch On

पक्राउ पर्नेमा मकवानपुर जिल्लाको थाहा नगरपालिका वडा नम्बर १२ निवासी ३६ वर्षीय बुद्धी बहादुर स्याङ्तान रहेका छन् । प्रहरीका अनुसार बुधबार काठमाडौँबाट वीरगञ्जतर्फ आउँदै गरेको प्रदेश २–०३–००१ ख ६३४८ नम्बरको मालवाहक ट्रकमा लागुऔषध लोड गरिएको भन्ने विशेष सूचनाका आधारमा प्रहरी चौकी सिर्सिया र जिल्ला प्रहरी कार्यालय पर्साबाट संयुक्त टोली खटिएको थियो ।

विभिन्न स्थानमा खोजतलास गर्दा वीरगञ्ज महानगरपालिका–२१ परवानीपुर चोकको सडकखण्डमा ट्रक रोकी राखेको अवस्थामा फेला पारिएको थियो । ट्रकको पछाडिको भागमा खोजतलास गर्दा सेतो प्लास्टिकको बोरामा लुकाइ छिपाइ राखिएको अवस्थामा १३ पोका चरेश फेला परेको पर्साका प्रहरी उपरीक्षक गौतम मिश्रले बताए । 

बरामद चरेशको कुल तौल ३ सय १९ केजी रहेको छ । साथै चालकले लगाएको हाफ पाइन्टको खल्तीमा नगद रू १,९२,००० फेला परेको प्रहरीले जनाएको छ । ट्रक चालकले आफूले धादिङबाट लोड गरी भारत पुर्याउन लागुऔषध चरेश ल्याएको प्रतिक्रिया दिएको पर्सा प्रहरीले जनाएको छ ।

ट्रक, नगद र चालकसहित प्रहरीले लागुऔषध सम्बन्धी कसूरमा पर्सा जिल्ला अदालतबाट पाँच दिनको म्याद थप अनुमति लिएर अनुसन्धान गरिरहेको जानाएको छ ।