काठमाडौं । रसुवामा आएको भीषण बाढीका कारण चार जलविद्युत् आयोजनामा ठूलो क्षति पुगेको छ । क्षतिको असरस्वरूप झन्डै २ सय मेगावाट विद्युत् उत्पादन बन्द भएको नेपाल विद्युत् प्राधिकरणले जनाएको छ।

प्राधिकरणका प्रवक्ता राजन ढकालका अनुसार १११ मेगावाट क्षमताको रसुवागढी जलविद्युत् आयोजना, चिलिमे, त्रिशूली–३ ‘ए’ र त्रिशूली–३ ‘बी’ मा उत्पादन रोकिएको छ। बाढीले रसुवागढीको हेडवर्क्स क्षतिग्रस्त भएको छ भने त्रिशूली–३ ‘ए’ को तीनवटा हेडवर्क्स बगाएको छ।

चिलिमे आयोजनाको टेलरेसमा पानी पसे पनि ठूलो क्षति नभएको जनाइएको छ। त्रिशूली–३ ‘बी’ को हब सबस्टेसनमा बाढी पस्दा त्यसको पनि सञ्चालन ठप्प भएको छ। यी आयोजनाबाट क्रमशः २२, ६० र ३७ मेगावाट विद्युत् उत्पादन हुँदै आएको थियो।

बाढीले त्रिशूली करिडोरमा रहेका प्रसारण लाइनको बाइपास टावरसमेत बगाएको प्राधिकरणका प्रवन्ध निर्देशक हितेन्द्रदेव शाक्यले जानकारी दिए।

यसैबीच चिलिमे जलविद्युत् आयोजनाका सीईओ बाबुराजा महर्जनले भोटेकोसी नदीमा आएको बाढीले आयोजनाहरूमा भौतिक संरचनामा गम्भीर क्षति पुर्‍याएको बताए।

मंगलबार बिहान तिब्बततर्फबाट आएको बाढीले नेपाल–चीन जोड्ने मितेरी पुलसमेत बगाएको छ। भन्सार यार्डमा राखिएका सवारी साधन बगाएका छन् भने कम्तीमा १८ जना सम्पर्कविहीन भएका छन्। उनीहरूमध्ये ३ जना प्रहरी, ६ जना चिनियाँ नागरिक र ९ जना नेपाली रहेका छन्।

सरकारले प्रभावित क्षेत्रमा उद्धार तथा क्षतिको मूल्याङ्कन सुरु गरिसकेको छ। जलविद्युत् उत्पादन पुनःसञ्चालनमा ल्याउन प्राधिकरणले प्राविधिक टोली खटाएको छ।