मोडल भण्डारीको प्लास्टिक सर्जरीमा लापरबाही भएको अदालतको ठहर, ग्राण्डी सिटी अस्पताल र डाक्टरलाई ५७ लाख क्षतिपूर्ति भराउन आदेश

काठमाडौँ । जाँघको आकार मिलाउने प्लास्टिक सर्जरीमा हेलचेक्र्याइँ गरेको भन्दै काठमाडौँको एक अस्पताल र त्यहाँका चिकित्सकबाट पीडितलाई ५७ लाख १९ हजार रुपैयाँ क्षतिपूर्ति भराउने फैसला उपभोक्ता अदालतले गरेको छ । 

Watch On

गत असार ५ गते भएको फैसला बिहीबार सार्वजनिक भएको हो । फैसला अनुसार उपभोक्ता अदालतले ग्राण्डी सिटी अस्पताल जमल र त्यहाँ कार्यरत प्लास्टिक सर्जरी गर्ने डाक्टर संजिव त्रिपाठीलाई एक महिलाको जाँघको आकार मिलाउने अप्रेशनमा लापरबाही गरेको ठहर गरेको हो । 

मोडल वर्षा भण्डारीले आफ्नो जाँघको आकार मिलाउन गरिएको अप्रेशनमा अस्पताल र चिकित्सकले हेलचेक्र्याइँ गरेको भन्दै २०८१ चैतमा ३ करोड १७ लाख रुपैयाँ क्षतिपूर्ति माग गर्दै अदालतमा निवेदन दर्ता गरेकी थिइन ।

शल्यक्रिया पश्चात शरीर सुन्दर र आकर्षक हुने भ्रमपूर्ण विज्ञापन गरेर आफू अप्रेशनका लागि गएको तर अप्रेसन पश्चात गम्भिर स्वास्थ्य जटिलता देखा परेको पीडितले निवेदनमा दाबी गरेकी थिइन् । 

सोही निवेदनमाथि भएको फैसलाको पूर्णपाठ बिहीबार तयार भएको हो । उपभोक्ता अदालतका अध्यक्ष रामप्रसाद शर्मा र सदस्यहरू गेहेन्द्रराज रेग्मी र आनन्दराज पोखरेलको इजलासले पीडित भण्डारीको शरीर सौन्दर्य बनाउने उक्त उपचारमा चिकित्सक र अस्पतालले लापरबाही गरेको ठहर गरेको छ ।

फैसलाअनुसार चिकित्सक डा संजिव त्रिपाठीले व्यक्तिगत रुपमा ४० लाख र ग्राण्डी सिटी अस्पतालले १७ लाख १९ हजार रुपैयाँ क्षतिपूर्ति पीडित भण्डारीलाई भराउनु पर्ने ठहर गरेको छ ।