सदनमा प्रतिवाद गर्न नसकेर हाम्रा नेताहरुको ‘डिपफेक अडियो’ छरपस्ट पारियोः हरि ढकाल

काठमाडौँ । राष्ट्रिय स्वतन्त्र पार्टीका सांसद हरि ढकालले सरकार विरोधको आवाज दवाउन लागेको आरोप लगाएका छन् । प्रतिनिधिसभा बैठकमा बाेल्दै उनले ९५ दिनदेखि आफूहरुले उठाइरहेको भिजिट भिसा प्रकरणमा भएको मानव तस्करी र भ्रष्टाचराका विषय राज्यले नसुनेको बताएका हुन् । 

‘हामी विगत ९५ दिनदेखि आन्दोलित छौँ । भिजिट भिसाको नाममा गरिएको मानव तस्करी भ्रष्टाचारविरुद्ध हामी आन्दोलित हुँदै गर्दा सत्ता पक्षले सुन्दैन ।’ 

उनले अन्य दलका सांससहरु रास्वपाका नेताहरुले २ मिनेटमा बोलेको विषयमा प्रतिवाद गर्न समय खर्च गरिहेको समेत आरोप लगाए । उनले आफ्ना नेताहरुको डिपफेक अडियो बनाउने कार्य समेत भएकोमा आपत्ति जनामए । ‘सत्ता पक्षका माननीज्यूहरुले हामीले बोलेको २ मिनेटका लागि यो ९५ दिन घन्टौँ समय प्रतिवादमा खर्च गरिरहनुभएको छ । कर्कस, अराजक शैलीमा मिथ्या आरोपहरु हामीमाथि लगाईराख्नुभएको छ ।’ उनले भने, ‘सदनमा सिर्जनात्मक बहस गर्ने हामीमाथि सदनभित्र नसकेर हाम्रा नेताहरुको डिपफेक भ्वाईस रेकर्डहरु समेत बाहिर छरपस्ट पार्न थालिएको छ ।’ 

उनले राणा शासनको उदाहरण दिदै विरोधका आवाज दवाएर लोकतन्त्र बलियो नहुने बताए । ‘विरोधका आवाजहरुलाई दमन गरेर लोकतन्त्र बलियो बन्दैन सभामुख महोदय  । राणाकालमा राणाहरुले विरोधीलाई झुन्डाइदिन्थे गोली हान्थे, मार्दिन्थे । बच्यो राणा शासन ? बचेन ।’