नेता बदनमाथि भएकाे आक्रमणबारे रास्वापले भन्योः विश्वसनीय छानबिन र दोषी माथि कारवाही होस्

काठमाडौँ । राष्ट्रिय स्वतन्त्र पार्टी (रास्वपा) ले केन्द्रीय सार्वजनिक मामिला विभागका सचिव बदन भण्डारीमाथि बुधबार साँझ  भएको आक्रमणको निन्दा गरेको छ । बिहीबार एक विज्ञप्ति जारी गर्दै रास्वपाले निन्दनीय घटनाको तत्काल विश्वसनीय छानबिन तथा दोषीलाई पक्राउ र कानुनी कारबाहीका गर्न माग गरेको  हो । 

Watch On

हिजो राति पौने ९ बजे कार्यालयबाट घर आउने क्रममा काठमाडौँको कपनस्थित प्रगति चोकमा नम्बर प्लेट छोपेर मोटरसाइकलमा आएका तीन जनाको समूहले भण्डारीको टाउकोमा फलामको रडले प्रहार गर्नुका साथै गाडीसमेत तोडफोड गरिएको रास्वपाले जनाएको छ ।
विज्ञप्तिमा रास्वपाले भनेको छ,‘हिजो राति काठमाडौँको कपनस्थित प्रगति चोकमा ज्यान लिने उद्देश्यसहित गरिएको आक्रमणको घोर निन्दा गर्दछौँ । कपनमै रहेको कार्यालयबाट राति ८ः४५ बजेतिर घर जाँदै गर्दा नम्बर प्लेट छोपेर मोटरसाइकलमा आएका तीन जनाको समूहले भण्डारीको टाउकोमा फलामको रडले प्रहार गर्नुकासाथै गाडीसमेत तोडफोड गरिएको छ । रड प्रहारबाट भण्डारीको टाउकोमा दश टाँका लगाउनु पर्ने गरी गहिरो चोट लागेको छ भने शरीरभर निलडाम छ’।   

पीडित भण्डारीका अनुसार नारी टिभीमा केही समयअघि दिएको अन्तरवार्तालाई कारण बनाएर निरन्तर धम्की आइरहेको र केही दिनअघि एक समूहले भण्डारीको अफिस रहेकै भवनमा आएर उनीबारे सोधखोज गरेका थिए ।  

घटना विवरण र आशङ्काबारे प्रहरीलाई जानकारी गराइएको भन्दै यस निन्दनीय घटनाको तत्काल विश्वसनीय छानबिन तथा दोषीलाई पक्राउ र कानुनी कारबाहीका गर्न माग गरेको छ ।