प्रहरी जवान राजेन्द्र थापा, जसले आफ्नो ज्यान दाउमा राखेर भिरमा अड्केकी रजनालाई जोगाए

काठमाडौँ । घटना हो मंसिर ८ गते रातको ८ बजेको । मकवानपुरको जिल्ला प्रहरी कार्यालयमा एउटा फोन आयो । ‘फोनमा कसैले सुनायो कि एकजना मान्छे भिरबाट खस्यो । त्यो मान्छे खोल्सामा अड्किएको छ । उद्धार गरिदिनुपर्यो ।’  

Watch On

उक्त सूचना  इलाका प्रहरी कार्यालय भिमफेदीमा फरवार्ड भयो । सूचना पाउनेवित्तिकै प्रहरी निरीक्षक सन्त कुमार श्रेष्ठको नेतृत्वमा इलाका प्रहरी कार्यालय भिमफेदीको टोली घटनास्थलतर्फ लाग्यो । घटनास्थल थियो  खहरे खोलाको भीर । केही बेरमा प्रहरी घटनास्थलमा पुग्यो । 

घटनास्थल पुगेपछि प्रहरीले थाहा पायो भिरमा अड्किएकोे मान्छे १४ वर्षको किशोरी हुन् । प्रहरीले घटनास्थल निरीक्षण गर्यो । केही सोधपुछ गर्यो । खहरे भिरको अन्दाजी ५० मिटर तल मान्छे सल्लाको रुखमा अड्किएको थाहा भयो । 

रातको समय छ, उभिएको किशोरी उद्धार माग गरिरहेकी छिन् । भिरमा अड्किएको मान्छेलाई उद्धार गर्ने उपकरण प्रहरीसँग छैन । उनीहरुसँग मान्छे उद्धारको लागि उपकरण ल्याउने र पर्खने समय पनि थिएन । 

प्रहरीले तत्काल मान्छेको उद्धार गर्ने निर्णय लियो । किनकी युवति अड्एिको ठाउँबाट तल झनै ठूलो भिर थियो । 

अब, ५० मिटर तल रहेको मान्छेलाई माथि ल्याउने कसरी ? उनीहरुले जुक्ति लगाए ।  एकजना प्रहरी शरिरमा डोरी बाँधेर भिरबाट तल झर्ने, त्यो डोरी माथि बसेकाले समाउने । डोरी बाँधेका प्रहरीले भिरमा अड्किएको किशोरीलाई समाउने र बुइमा बोकेर माथि ल्याउने । यो उपाए सुन्दा जति सजिलो देखिन्छ गर्न उति सजिलो पटक्कै थिएन । 

अर्को कुरा आफ्नै ज्यान दाउमा राखेर तल भिरमा जाने को ? किनकी त्यो जाने मान्छे नै फर्कन्छ फर्कदैन भन्ने डर त थियो नै । केही तलमाथि भएर डोरी छुटेमा २ जनाको ज्यान जानसक्ने जोखिम थियो । 

तर, प्रहरी जवान राजेन्द्र थापाले यस्ता दायाँ बायाँ केही सोचेनन् । किशोरीको उद्धार गर्नको लागि डोरी बाँधेर भिरमा जान तयार भए । 

प्रहरी जवान राजेन्द्र थापाको ज्यूमा मोटो डोरी बाँधियो । तर, पुगेपछि युवतिलाई बाँध्नको लागि उनले छुट्टै डोरी घाँटीमा अड्काए । उनले मुखमा डोरी एउटा सानो टर्चलाइट च्यापे डिलबाट तल झरे । माथि रहेकाहरुले बिस्तारै उनको ज्यानमा बाँधिएको डोरी छोड्दै गए ।  बिस्तारै बिस्तारै राजेन्द्र डिलबाट भिरतिर झर्दै गए । डिलबाट खिचिएको भिडियोमा उनी देखिन छाडे । 

केही समयपछि किशोरीलाई पिठ्युमा बोकेर राजेन्द्र डिलमा आए । त्यसपछि सबैले राहतको सास फेरे । ति किशोरी थिइन् १४ वर्षकी रजना स्याङ्ताङ । भीमफेदी गाउँपालिका वडा नं ५ ढुसिनीपुल स्थित छबेली बस्ने स्याङ्ताङ घरबाट छबेलि बजारतर्फ जाँदै थिइन् । सोही क्रममा उनी खहरे खोलाको भिरबाट करिब ७ बजेतिर बाटोबाट ५० मिटर तल भिरमा खसेकी थिइन् ।

बुुबा हिरा बहादुर स्याङताङका अनुसार छोरी रजना साथीसँग भेट्न जाने क्रममा करिब बेलुका करिब साढे ६ बजेदेखि ७ बजेको बीचमा भिरबाट खसेकी हुन् । छोरी खसेको बिषयमा गाउँकै अर्को साथीले फोन गरेर भने पछि आफू घटनास्थल पुुगेको उनले सिधाकुरालाई बताए । 

उनकाअनुसार छोरी भिरको बाटोबाट हिंड्ने क्रममा एउटा खुट्टा चिप्लिएर भिरबाट उत्तानो परेर भिरबाट खसेकी थिइन । तर, भाग्यले उनी सल्लाको रुखमा अड्किएर एउटा सानो ठाउँमा ठिङ्ग उभिएको बुुबा हिराले बताए । उनले छोरीका उद्धार गर्ने प्रहरीप्रति आभार प्रकट गरे । 

छोरीको स्वास्थ्य अवस्था अहिले राम्रो रहेको बुुबा हिराले बताए । ईलाका प्रहरी कार्यालय भिमफेदीका प्रहरी निरीक्षक सन्त कुमार श्रेष्ठकाअनुसार प्रहरी जवान राजेन्द्रको शाहसले किशोरीको उद्धार सम्भव भएको हो । बेलैमा प्रहरीले सूचना पाउनुु र सबै मिलेर एक साथ काम गर्दाको नतिजा भएको इन्सपेक्टर श्रेष्ठले बताए ।

भिमफेदी गाउँपालिका ५ का वडा अध्यक्ष जहर सिंह लामाले प्रहरीको सहयोगका कारण बालिकाको ज्यान बचेको बताए । कठिन अवस्थामा रहेकी युवतिको ज्यान बचाएर प्रहरीले आफ्नो कार्यकुुशलता प्रर्दशन गरेको अध्यक्ष लामाको भनाई छ । यो घटनाले समाजमा प्रहरी र नागरिकको सम्बन्ध स्थापित भएको बताए ।