मुख्य समाचार

रिलायन्सको आइपीओ छेडखानी अनुसन्धान हुने

सिधाकुरा

शुक्रबार, पुस ४, २०८२

काठमाडौँ । रिलायन्स स्पिनिङ मिल्सको आईपीओ मूल्य र आईपीओ निष्कासनको प्रक्रिया छानबिनमा परेको छ । पुरानो वित्तिय विवरणका आधारमा शङ्कास्पद तवरले महँगो आइपिओ जारी भएको गुनासो पछि अर्थ मन्त्रालयले नेपाल धितोपत्र बोर्डलाई छानबिन गरि प्रतिवेदन पेश गर्न निर्देशन दिएको हो ।

रिलायन्सको आईपीओको सन्दर्भमा उठेका प्रश्नबारे छानबिन गर्न निर्देशन दिँदै बोर्डलाई पत्राचार गरिएको अर्थ मन्त्रालयका प्रवक्ता एवम् सहसचिव टङ्कप्रसाद पाण्डेयले सिधाकुरालाई बताए । ‘ मन्त्रालयले नेपाल धितोपत्र बोर्डलाई पत्राचार गरेर आईपीओका सन्दर्भमा उठेका प्रश्नबारे छानबिन गर्न भनेको छ,’ प्रवक्ता पाण्डेयले भने,‘ हामीले पुष १ गते पत्राचार गरेका हौँ ।’

उनकाअनुसार रिलायन्स स्पिनिङ मिल्सको आईपीओको निस्कासन मूल्य, कम्पनीको वित्तिय अवस्था लगायतकाबारेमा सञ्चार माध्यम तथा विभिन्न ठाउँमा प्रश्न उठेपछि छानबिनको निर्देशन भएको हो ।
स्पिनिङ मिल्सले बुक बिल्डङ विधिबाट आईपिओ जारी गर्न अनुमति पाएको छ । उसले ८२० रुपैयाँ ८० पैसा प्रतिकित्ताका दरले वैदेशिक रोजगारीमा रहेका नेपालीका लागि आइपिओ जारी गरिसकेको छ । अबको केही दिनमा सर्वसाधारणका लागि कम्पनीले साधारण आईपीओ जारी गर्दैछ तर त्यस अघि नै अर्थले छानबिन सुरु गरेको हो ।