१८ करोडको अडियोले कांग्रेसमा तरंग, पार्टी किनबेच भएको देउवाको टिप्पणी

काठमाडाैँ । केही दिनअघि कांग्रेस सभापति गगनकुमार थापाले सामाजिक सञ्जालमार्फत भिडियो सन्देश जारी गरेर भने– एक पैसाको पनि लेनदेन भएको छैन, कुनै अनियमितता गरेको छैन । 

Watch On

गगन थापाले किन यसरी स्पष्टीकरण दिनुपर्यो ? यसको कारण हो–  अनुसन्धानका क्रममा प्रहरीको हिरासतमा रहेका बिचौलिया इनम सापकोटाको भनिएको अडियो । इनमले प्रहरीलाई दिएको बयान भन्दै सार्वजनिक भएको अडियोमा कांग्रेसको आधिकारिकता मुद्दा फैसलाको प्रसंग छ– जहाँ विशेष अधिवेशनमा निर्वाचित नेतृत्वलाई आधिकारिता दिलाउन सभापति थापा र सर्वोच्चका न्यायाधीशहरुका बीचमा अठार करोडको डिल भएको भनिएको छ । 

शनिबार आफू पक्षीय कांग्रेसको काठमाडौं जिल्ला अधिवेशनको राष्ट्रिय सभागृहमा उद्घाटन गर्दै देउवाले पार्टीको आधिकारिकता किनबेच भएको र यसको स्पष्ट छानबिन हुनपर्ने बताए । त्यही सभामा देउवा पक्षीय अन्य नेताहरुले पनि अठार करोडको प्रसंग बारम्बार कोट्याए । 

गत पुस अन्तिम साता भएको कांग्रेसको विशेष महाधिवेशनलाई निर्वाचन आयोगले मान्यता दियो । निर्वाचन आयोगको निर्णयलाई गत वैशाख ४ गते सर्वोच्चले पनि सदर गरिदियो । विशेष महाधिवेशनबाट निर्वाचित केन्द्रीय समितिले असोज १८ देखि २३ गतेसम्म काठमाडौँमा पन्ध्रौं महाधिवेशन गरेर नयाँ नेतृत्व पनि चयन गरिसकेको छ । उनै गगन थापाको नेतृत्वमा नयाँ केन्द्रीय समिति बनेको छ । 

गगन थापा नेतृत्वको कांग्रेसले पन्ध्रौं महाधिवेशन गरिसक्दा विशेष महाधिवेशनमा सहभागी नभएको र त्यसपछि भएको पन्ध्रौं महाधिवेशनमा पनि सहभागी नभएको पक्षले छुट्टै महाधिवेशन गर्दैछ । त्यो समूहको नेतृत्व स्वयं अपदस्थ सभापति शेरबहादुर देउवाले नै गरेका छन् । पूर्वमहामन्त्री डाक्टर शशांक कोइरालालाई महाधिवेशन तयारी समिति संयोजक बनाइए पनि जे गर्न खोजिँदैछ, त्यो सबै देउवाकै नेतृत्व र निर्देशनमा गरिँदैछ । 

देउवा त्यतिबेला विशेष महाधिवेशनको पक्षमा थिएनन् । तत्कालीन केन्द्रीय समितिका अधिकांश पदाधिकारी र सदस्यहरु पनि विशेष महाधिवेशनको पक्षमा थिएनन् । त्यहीबेला ५५ प्रतिशतभन्दा बढी महाधिवेशन प्रतिनिधिले नेतृत्व परिवर्तनको प्रस्तावसहित विशेष महाधिवेशन गर्न माग गर्दै केन्द्रीय कार्यालयमा निवेदन दिए । विशेष महाधिवेशन टार्न नियमित महाधिवेशनको मिति तोकियो । तर, केन्द्रीय समितिले तोकेको मितिमा महाधिवेशन सम्भव भएन, नयाँ मिति घोषणा गरियो । त्यही अवस्थामा तत्कालीन दुई महामन्त्रीहरु गगन थापा र विश्वप्रकाश शर्माले विशेष महाधिवेशन आह्वान गरिदिए । विशेष महाधिवेशनले नेतृत्व मात्रै परिवर्तन गरेन, केन्द्रीय समिति नै फेरिदियो । विवाद निर्वाचन आयोग हुँदै सर्वोच्चसम्म पुग्यो, पहिले आयोगले विशेष महाधिवेशनलाई आधिकारिक ठहर गर्यो, पछि सर्वोच्चले पनि त्यसैलाई सदर गरिदियो । 

कांग्रेसको खास विवाद यही हो । यही विवादमा, सर्वोच्च अदालतबाट विशेष महाधिवेशन पक्षलाई आधिकारिक हो भनेर फैसला हुनुमा पैसाको चलखेल भयो भनेर अहिले खलबली मच्चिएको छ । र, त्यो विवाद उप्काइदिएका छन्– इनम सापकोटाले । 
एकपटक टुंगिसकेको कांग्रेसको विवाद सर्वोच्च अदालतमा फेरि ब्युँतिएको छ । सर्वोच्चले फैसला पुनरबलोकनका लागि निस्सा दिएपछि कांग्रेसको आधिकारिकता सम्बन्धी मुद्दामा फेरि पूर्ण इजलासमा सुनुवाइ हुने छ । एकातिर मुद्दाको पुनः सुनुवाइ, अर्कातिर कांग्रेसका दुवै पक्ष आ आफ्नो समूहको महाधिवेशन अनि त्यही समयमा आएको इनमको अडियो– कांग्रेसका दुवै समूह तरंगित छन् । 

सँगै, यही प्रकरणका कारण उत्पन्न विवादका कारण आइतबार कांग्रेसका सहमहामन्त्री अजयबाबु शिवाकोटी नेपाल प्रहरीको साइबर ब्युरोमा उपस्थित भए । यही प्रकरणमा उनले लेखेको फेसबुक स्टाटसका कारण पत्रकार रोशन खड्काले दिएको उजुरीका आधारमा शिवाकोटीलाई ब्युरोले बोलाएको हो । 

यति मात्रै होइन, बितेका केही दिन त सभापति गगन थापा नै पक्राउ पर्ने चर्चा चल्यो । बिचौलियासँग मिलेर मुद्दा प्रभावित पारेको आरोपमा सरकारले गगनलाई पक्राउ गर्दैछ भने हल्ला चल्यो । सरकारले सादा पोशाकका प्रहरी परिचालन गरेर गगनको निगरानी गरिरहेको विषय पनि उठ्यो । त्यही हल्ला फैलिएपछि त गगनले भिडियो सन्देश जारी गरेका थिए । 

त्यसअगावै वरिष्ठ उपसभापति विश्वप्रकाश शर्माले पत्रकार सम्मेलन गरेर आधिकारिकता विवादमा कुनै बदनियत नभएको स्पष्टीकरण दिएका थिए । उनले १८ करोड प्रकरणमा पार्टीमाथि उठेका जुनसुकै प्रश्नको सामना गर्न र जस्तोसुकै छानबिनका लागि तयार रहेको बताउँदै यस प्रकरणसँग सम्बन्धित सम्पूर्ण घटनाको स्वतन्त्र, निष्पक्ष, विधिसम्मत र विश्वसनीय अनुसन्धान गर्न माग गरे ।

त्यसयता कांग्रेसका हरेकजसो नेताहरुले सभापतिमाथि गलत आरोप लगाइएको र सरकार दबाबमा पर्दै गएपछि प्रश्न छेक्न गगनलाई आरोप लगाउन खोजिएको दाबी गरिरहेका छन् । 

स्वयं गगनले नै सार्वजनिक समारोह, पार्टीका बैठकदेखि सामाजिक सञ्जालसम्म, आफूलाई बारम्बार तर्साउन खोजिएको तर तर्सिने बानी नपरेको बताइरहेका छन् । आफ्नो हात सफा रहेको भन्दै समर्थकलाई विश्वस्त पार्न खोजिरहेका छन् भने सक्छौ भनेर छानबिन गरेर देखाऊ भन्दै सरकारलाई चुनौती पनि दिइरहेका छन् । 

तर, कतिपयले के शंका गरिरहेका छन् भने जुन दिन अठार करोडको प्रसंग सार्वजनिक भयो, त्यसैको भोलिपल्ट राति उनै गगन एमाले अध्यक्ष केपी ओलीलाई भेट्न भक्तपुरको गुण्डु पुगे । मधेश प्रदेश सरकारको समीकरणबारे छलफल गर्न गगन गुण्डु पुगेका थिए । तर, चर्चा अठार करोडसँग जोडेर भयो । एकातिर अठार करोडको आरोप, अर्कातिर जेनजी आन्दोलनबाट अपदस्थ प्रधानमन्त्री ओलीसँग भेट, यी दुई विषय कतै सम्बन्धित छैनन् ? कतिपयले आशंका पनि व्यक्त गरे । थापाका आलोचकहरुले के यो बाघ कराउनु र बाख्रो हराउनु जस्तै हो वा अरु केही भनेर प्रश्न गरिरहेका छन् । 

कांग्रेस र एमालेको यसअघिको हिमचिम देशका लागि लाभदायक देखिएन । नक्कली भुटानी शरणार्थी सम्बन्धी मुद्दाको अनुसन्धानले कांग्रेसका केही उच्च नेताको ढोका ढकढक्याएपछि २०८१ असार १७ गते कांग्रेसका तत्कालीन सभापति शेरबहादुर देउवा र एमाले अध्यक्ष ओलीबीच सत्ता समीकरणको सम्झौता भयो । त्यही सम्झौताअनुसार ओली प्रधानमन्त्री बने । तर, ओलीले देउवालाई सत्ता हस्तान्तरण गर्नुभन्दा केही महिनाअघि जेनजी आन्दोलन भयो, कांग्रेस एमालेको सत्ता ढल्यो, संसद विघटन भयो, नयाँ चुनाव भयो । 

कतिपयले त यस्तो पनि भनेका छन्, त्यतिबेला देउवा संकटमा परे र ओलीको साथ माग्न गए, अहिले गगन संकटमा परे र उनै ओलीको शरणमा गगन पुगे । 

गगन र ओलीबीच मधेश सरकारबारे छलफल भएको भनिए पनि मधेश सरकारबाट एमाले बाहिरिएको छ । यसको अर्थ स्पष्ट बुझ्न सकिन्छ– कांग्रेसको नेतृत्वमा रहेको मधेश प्रदेश सरकार अब संकटमा परेको छ । एमाले, नेकपा र जसपाबीच मधेशमा कांग्रेस नेतृत्वको सरकार हटाउने सहमति भइसकेको छ । गुण्डुमा भएको ओली–गगन भेट यो विषयमा पनि उपलब्धिमुलक बन्न सकेन । उल्टै गगनका आलोचकलाई आलोचना गर्ने विषय मात्रै बन्यो । 

गगन थापा पछिल्लो समयमा आशा गरिएकामध्येका एक नेता हुन् । परम्परागत राजनीतिमा पुस्तान्तरण र रुपान्तरणको नेतृत्व गर्ने नेता उनै गगन हुन् । उनी तार्किक छन्, भन्नुपर्ने कुरा सबैले बुझ्ने गरी स्पष्ट भन्छन् । संसदमा कांग्रेस प्रमुख प्रतिपक्षी छ । विपक्षी दलहरुको नेतृत्व कांग्रेसले नै गरेको छ । सरकार र विशेषगरी प्रधानमन्त्री बालेन शाहको काम कारबाही, निर्णय, कदम र कार्यशैलीको कांग्रेसले निरन्तर विरोध गरिरहेको छ । यसमा पनि गगन सबैभन्दा अगाडि छन् । सरकारको कडा आलोचकका रुपमा गगन चिनिएका छन् । त्यसैले पनि सरकारले उनलाई निशाना बनायो भन्नेहरु पनि उत्तिकै छन् । सरकारले आफ्नो विरोध रोक्न र आफूमाथि उब्जिने प्रश्न बन्द गर्न गगनमाथि चार्ज लगाएको कांग्रेस नेताहरुको दाबी छ । 

एउटा अप्रमाणित अडियोले कांग्रेस नेतृत्वमाथि नै प्रश्न उठिरहँदा कांग्रेसले भने प्रधानमन्त्री र उनको टिममाथि नै छानबिनको माग गरेको छ । केही अपारदर्शी र स्वेच्छाचारी निर्णय, प्रहरी प्रमुख हेरफेर, पत्रकारमाथिको धरपकड र संवैधानिक निकायमाथि नियन्त्रण जमाउने कदमविरुद्ध सबै एकजुट भएर प्रतिवादमा उत्रिनुपर्ने कांग्रेसको दाबी छ । 

कांग्रेस सभापति गगन थापामाथि प्रश्न उठेको छ । प्रश्न उठेपछि जवाफ आउनुपर्छ । थापाले आफ्नोतर्फबाट जवाफ दिइसकेका छन् । अब जवाफ सरकारले दिनुपर्नेछ । कांग्रेसले छानबिन गर भनेको छ । कांग्रेसले भने पनि नभने पनि सार्वजनिक भएको विषयमा सरकारले छानबिन गर्नुपर्छ । छानबिन गगन थापामाथि पनि गरिनुपर्छ । योसँगै अनुसन्धानका क्रममा रहेका एक व्यक्तिको बयान भनिएको अडियो कसरी सार्वजनिक भयो, यसबारेमा पनि छानबिन गरिनुपर्छ । इनम प्रकरणले प्रधानमन्त्रीका मुख्य सल्लाहकार कुमार बेन पनि विवादमा तानिएका छन् । यसमा पनि छानबिन गरेर सत्यतथ्य सार्वजनिक भएमा मात्र सरकारप्रति आम नागरिकको विश्वास बढ्ने छ ।