वडा कार्यालमा देखिएको फरक दृश्यः वडा सदस्यले लेखिदिन्छन् निवेदन, गरिदिन्छन् प्रक्रियामा सहजीकरण

बर्दघाट । सरकारी कार्यालयमा जाँदा हरेक विवरण कागजी हुनुपर्छ । सामान्य कुराको पनि अभिलेख राख्नका लागि निवेदन बुझाउनुपर्छ । सबै नागरिकलाई निवेदन लेख्न आउँदैन । आउनेले सरकारी ढाँचामा मिलाएर लेख्न सक्छन् भन्ने छैन । अनी जानुपर्छ सरकारी कार्यालय बाहिर थापिएका दोकानमा, वा कार्यालय वरीपरी घुम्ने लेखनदासको मा । उनीहरुलाई उनीहरुले नै तोको शुल्क तिरेर काम  गराउनुपर्ने हुन्छ । 

तर नवलपरासी बर्दघाट (सुस्ता पश्चिम) को बर्दघाट नगरपालिका वडा नं. १५ मा देखिने दृश्य भने फरक छ । यहाँ सरकारी कामकाजका लागि बाहिरको पसलमा गएर निवेदन लेख्न लगाउन पर्दैन । अझ सामान्य फोटोकपीका लागि बाहिर गएर शुल्क तिर्नु पनि पर्दैन । त्यहाँ उक्त वडाका वडासदस्यहरु नागरिकको सेवामा दैनिक हाजिर हुन्छन् । उनीहरुले नै निवेदन, परामर्श तथा आवशयक कागजी प्रक्रिया पुरा गरिदिन्छन् । 

Watch On

सरकारले छिटो छरितो रुपमा कार्यसम्पादन गर्न कार्यालयमा विचौलीया निषेधको वातावरण बनाएपछि बर्दघाट नगरपालिका वडा नं.१५ ले सरकारको परिपत्रलाई कार्यन्वयनमात्र गरेन थप परिस्किृत गरि लागू गरेको छ । बैशाख २ गतेबाट वडाका जनप्रतिनिधिको निर्णयले सेवाग्राीलाई निकै सहज भएको छ । 

बर्दघाट १५, पृथ्वीबस्तीका सुर्यबहादुर विकले भने, ‘पहिले पहिले आफु वडा कार्यालय आऊँदा निवेदन बाहिर लेखाऊन पर्थ्यो, आवश्यक फोटोकपी बाहिर गर्नुपर्ने लगायतको झन्झट मात्र थिएन विचौलीयाले मागेको रकम दिनुपर्ने बाध्यता रहेको थियो । अहिले वडा कार्यालयमै वडासदस्यहरुमार्फत निवेदन लगायतका काममा सहजीकरण पश्चात निकै सहज भएको छ ।’  निःशुल्क निवेदन तथा फोटोकपी सेवाले आफूलाई सहुलियत मिलेको उनको भनाइ छ । 

त्यस्तै वडाकार्यालयमा नागरिकताको प्रतिलिपिका लागि सिफारिस लिन आएका राजेश विकले पनि पहिले भन्दा वडाकार्यालयमा सुविधा पाएको बताए। उनि भन्छन्, ‘पहिले बाहिर लेख्नेमान्छे खोज्नुपथ्र्यो, लेख्नेलाई पैसा दिनुपर्ने हुन्थ्यो । अहिले लेख्नेमान्छे पनि भित्रै छन् । लेख्नेमान्छेलाई पैसादिनुपर्ने पर्दैन । जनतालाई सहज भएको छ ।’ 

वडाले वडापरिसरमा बस्ने लेखन्दासहरुलाई हटाएको छ । वडाले अहिले वडा सदस्य प्रयोग गरेर चार जना वडा सदस्यलाई हरेक हप्ता १ जनाले अनिवार्य जनतालाई सहजीकरण गर्ने निर्णय गरि कार्यान्वयन गरेको छ । वडामा आएका सेवाग्राहीलाई आवश्यक निवेदन तथा सहजीकरण निःशुल्क गरि आएका सेवाग्राहीको निवेदन अनिवार्य त्यस दिन जिम्मालिएको वडा सदस्यले गर्नुपर्ने छ । 

अहिले हरेक वडासदस्य पनि परिचालित भएका छन भने सेवाग्राहीपनि खुसी भएको महसुस गरेको वडासदस्य मनकाजी परियार बताऊछन् । परियार भन्छन, ‘हामी निःशुल्क खट्ने र हरेक सेवाग्राहीलाई सेवा दिने प्रतिवद्धता अनुरुप लागि परेका छैँ ।’ 

वडाले वडाकार्यालयमा आऊने सेवाग्राहीलाई फोटोकपी, निवेदन तथा सामान्य अनलाईनबाट हेर्न मिल्ने सेवाहरुलाई कुनै दस्तुर नलिई सेवा दिईरहेको र आफूहरु रहिन्जेल यो कार्य निरन्तर लागूगर्ने वडाअध्यक्ष रुद्र बहादुर आलेले बताए । वडाअध्यक्ष आले भन्छन, ‘पहिले पहिले वडाकार्यालयमा रहेर काम गर्ने विचौलीयाका कारण सेवाग्राही आजित थिए । तर अहिले सेवाग्राही खुसी छन् । जनतासंग प्रत्यक्ष संवाद गर्ने अवसर मिलेकोमा वडासदस्यहरु खुसी छन् ।’