उदयपुरगढीका स्थानीय कसमस सिमेन्टविरुद्ध आन्दोलित

उदयपुर । उदयपुरगढी गाउँपालिका वडा नं ८ नेपालटार क्षेत्रमा सञ्चालित कसमस सिमेन्ट उद्योगको चुनढुङ्गा ढुवानीका कारण आफूहरुको जनजीवन प्रभावित बनेको भन्दै स्थानीय बासिन्दाले उद्योगविरुद्ध आन्दोलन थालेका छन्।

उद्योगका टिपरहरूले भारवहन क्षमताभन्दा बढी भार बोक्ने, सडक मर्मतमा बेवास्ता गर्ने, स्थानीयको गुनासो नसुन्ने गरेको भन्दै स्थानीयले उद्योगले प्रयोग गर्दै आएको बाटो पूर्ण रूपमा बन्द गर्ने निर्णय गरेका हुन्।

Watch On

स्थानीयका अनुसार उद्योगका भारवहन क्षमता भन्दा बढी भार बोक्ने  टिपरहरूको निरन्तर आवतजावतले नेपालटार क्षेत्रको सडक बर्खामा हिलाम्मे र हिउँदमा अत्यधिक धुलाम्मे हुने गरेको छ। सडक जीर्ण बन्दा विद्यालय जाने विद्यार्थी, बिरामी बोकेका एम्बुलेन्स, वृद्धवृद्धा तथा पैदल यात्रुहरूलाई दैनिक आवतजावतमा सास्ती खेप्नुपरेको छ।

गत जेठ २ गते शनिबार स्थानीय बासिन्दा, जनप्रतिनिधि तथा उद्योगका प्रतिनिधिबीच सडकको स्थलगत अवलोकन गरी समस्या समाधानका लागि सहमति भएको थियो। तर, उद्योग पक्षले उक्त सहमतिप्रति चासो नदेखाएको र आइतबार बोलाइएको बैठकमा समेत प्रतिनिधि नपठाएपछि स्थानीयहरू आक्रोशित बनेका हुन्।

आइतबार वडा अध्यक्ष थिरबहादुर राउतको अध्यक्षतामा बसेको स्थानीय बासिन्दा, अभिभावक तथा सरोकारवालाहरूको संयुक्त बैठकले उद्योगले प्रयोग गर्दै आएको वैकल्पिक मार्ग र खानी क्षेत्रबाट हुने ढुङ्गा ओसारपसार अर्को निर्णय नभएसम्म पूर्ण रूपमा बन्द गर्ने निर्णय गरेको छ। बैठकले खानीमा ढुङ्गा लिन आएका टिपरहरूलाई आइतबारबाटै फिर्ता पठाउने तथा उद्योगका प्रतिनिधि र जिल्ला प्रशासनको उपस्थितिमा अर्को सहमति बैठक नबसेसम्म सञ्चालन गर्न नदिने निर्णय समेत गरेको जनाएको छ। बैद्यनाथ टोल विकास संस्थाले जारी गरेको सूचनाअनुसार जेठ ४ गते सोमबारदेखि कडाइका साथ बन्द लागू गरिनेछ।

स्थानीय मिना राउतले उद्योगले नाफा कमाउने बाहेक स्थानीयको समस्या नहेरेको आरोप लगाइन्। ‘उद्योगले मुनाफा मात्रै हेर्यो, यहाँका बासिन्दाको पीडा, सडकको अवस्था र बालबालिकाको जोखिमलाई वास्ता गरेन’ उनले भनिन्। स्थानीयले उद्योगले प्रयोग गरिरहेको सडकमा चुनढुङ्गा ढुवानी रोक्न तथा वैकल्पिक मार्ग निर्माण गर्न पटक–पटक आग्रह गरे पनि बेवास्ता गरेको बताए ।

भारवहन क्षमताभन्दा बढी चुनढुङ्गा बोकेका टिपरका कारण सडक चाँडै भत्किने, दुर्घटनाको जोखिम बढ्ने, धुलोका कारण श्वासप्रश्वाससम्बन्धी समस्या निम्तिने, वर्षायाममा सडक हिलाम्मे हुँदा सवारी दुर्घटना र आकस्मिक स्वास्थ्य सेवामा समेत असर पर्ने स्थानीयको भनाइ छ। स्थानीयले उद्योगले सडक मर्मत, धुलो नियन्त्रण, सुरक्षित ढुवानी तथा वैकल्पिक मार्गको व्यवस्था नगरेसम्म आन्दोलन जारी राख्ने बताएका छन्। हाल कसमस सिमेन्ट उद्योगको लागि नेपालटार हुँदै धनुषाको महेन्द्रनगरसम्म चुनढुङ्गा ढुवानी हुँदै आएको छ।